04514

मनोरंजनात्मक स्पर्धांचा मुलांनी घेतला आनंद

घारपी शाळेत बाल दिन; पंडित नेहरू यांना वंदन

बांदा, ता. १५ ः घारपी येथील जिल्हा परिषद शाळेत बाल दिन उत्साहात झाला. शाळेत राबविलेल्या विविध उपक्रमांनी विद्यार्थ्यांसाठी हा दिवस आनंददायी ठरला. या दिवशी भारताचे पहिले पंतप्रधान पंडित जवाहरलाल नेहरू यांच्या जयंतीनिमित्त विद्यार्थ्यांनी विविध सांस्कृतिक, शैक्षणिक आणि क्रीडा उपक्रमांमधून त्यांना आदरांजली अर्पण केली.
कार्यक्रमाची सुरुवात नेहरूंच्या प्रतिमेचे पूजन, दीपप्रज्वलन आणि पुष्पार्पण करून झाली. यावेळी प्रार्थना, देशभक्तीपर गीते सादर केली. शाळेतील विद्यार्थी बळीराम गावडे याने चाचा नेहरू यांची लक्षवेधी वेशभूषा साकारली होती. विद्यार्थ्यांच्या हातावर मेहंदी रेखाटन तसेच संगीत खुर्ची, लिंबू-चमचा, बादलीत चेंडू टाकणे, रस्सीखेच आदी विविध पारंपरिक व मनोरंजनात्मक खेळ घेण्यात आले‌. यामध्ये सर्व विद्यार्थ्यांनी उत्साहाने सहभाग घेतला. मुख्याध्यापक जे. डी. पाटील यांनी, बाल दिन हा मुलांच्या निरागसतेचा आणि स्वप्नांचा उत्सव आहे. त्यांच्या शिक्षणात, कल्पकतेत आणि संस्कारांत गुंतवणूक केली, तर राष्ट्र अधिक सक्षम होईल, असे सांगितले. कार्यक्रम यशस्वी होण्यासाठी सहकारी शिक्षक धर्मराज खंडागळे, मुरलीधर उमरे, आशीष तांदुळे, अंगणवाडी सेविका संजना गावकर, मदतनीस अमृता कविटकर, संचिता सावंत यांनी परिश्रम केले.