05216

भाजपचे माजी जिल्हाध्यक्ष
विजयकुमार मराठे यांचे निधन

सकाळ वृत्तसेवा
दोडामार्ग, ता. १८ ः भाजपचे माजी जिल्हाध्यक्ष तसेच तळकट येथील रहिवाशी विजयकुमार भिकाजी मराठे (वय ७८) यांचे आज पहाटे म्हापसा गोवा येथे अल्प आजारपणामुळे उपचारादरम्यान निधन झाले.
श्री. मराठे राष्ट्रीय स्वयंसेवक संघामध्ये अनेक वर्षे सक्रिय होते. दोडमार्ग तालुक्यात संघाचे काम विस्तारण्यात त्यांचा मोठा वाटा होता. जिल्ह्यातील भाजपच्या जुन्या पिढीतील ज्येष्ठ नेत्यांमध्ये त्यांचा समावेश होता. आयुष्यभर त्यांनी या पक्षाच्या वाढीसाठी प्रयत्न केले. जिल्हाध्यक्ष म्हणून त्यांनी केलेले कामही लक्षवेधी होते. ते स्वतः बागायतदार होते. जिल्ह्यातील फळ बागायतदातरांच्या प्रश्नांना वाचा फोडण्यासाठी त्यांनी मोठे काम केले. जिल्हा फळ बागायतदार संघाचे अध्यक्ष म्हणून त्यांनी दीर्घकाळ काम केले. तळकट पंचक्रोशीत विविध सामाजिक कार्यांमध्ये ते सक्रिय असायचे. उपचार सुरू असताना त्यांचे निधन झाले. त्यांच्यावर तळकट येथील स्मशानभूमीत अंत्यसंस्कार करण्यात आले. त्यांच्या मागे पत्नी, मुलगा, विवाहित मुलगी, सुन, नातवंडे असा परिवार आहे. भाजपचे जिल्हाध्यक्ष प्रभाकर सावंत, राजू राऊळ, गुरुनाथ दामले, एकनाथ नाडकर्णी, राजेंद म्हापसेकर, दोडामार्ग नगराध्यक्ष चेतन चव्हाण आदींनी पार्थिवाचे अंत्यदर्शन घेतले. न्यायाधीश चंद्रशेखर मराठे यांचे ते वडील होत.