सावंतवाडीत १४ डिसेंबरला
स्वरचित काव्यवाचन स्पर्धा

सकाळ वृत्तसेवा
सावंतवाडी, ता. १९ ः महाराष्ट्र राज्य साहित्य संस्कृती मंडळातर्फे २८ डिसेंबरला येथे आयोजित सिंधुदुर्ग जिल्हा साहित्य संमेलनानिमित्त १४ डिसेंबरला जिल्हास्तरीय स्वरचित काव्यवाचन स्पर्धेचे आयोजन केले आहे. या स्पर्धेसाठी पाच उत्कृष्ट, तर दोन उत्तेजनार्थ कवितांची निवड केली जाणार आहे. विजेत्यांना रोख बक्षिसे, स्मृतिचिन्ह, पुस्तक आणि प्रमाणपत्र देण्यात येणार आहे.
स्पर्धकाला विषय निवडीचे स्वातंत्र्य असेल. कविता कोणत्याही प्रकारची (प्रेरणादायी, विनोदी, शैक्षणिक, सामाजिक) असू शकेल; मात्र ती मूळ स्वरचित असावी. कविता सादरीकरणासाठी योग्य असावी. प्रत्येक स्पर्धकाने स्पर्धेपूर्वी कवितेची लिखित प्रत संयोजकांकडे सादर करावी. एका स्पर्धकाला केवळ एक कविता सादर करता येईल. पहिल्या पाच कवितांना प्रत्येकी १ हजार रुपयांचे बक्षीस, तर उत्तेजनार्थ दोन कवितांना ५०० रुपयांचे पारितोषिक दिले जाणार आहे. याशिवाय जिल्हास्तरीय साहित्य संमेलनात स्मृतिचिन्ह, पुस्तक आणि प्रमाणपत्र देण्यात येणार आहे. महाराष्ट्र राज्य साहित्य संस्कृती मंडळातर्फे प्रत्येक जिल्ह्यात जिल्हास्तरीय साहित्य संमेलन घेण्यात येत आहे. सिंधुदुर्गात श्रीराम वाचन मंदिर याचे आयोजन करत आहे. स्पर्धेची अधिक माहिती व सहभागासाठी श्वेतल परब यांच्याशी संपर्क साधावा, असे आवाहन संमेलन आयोजन समितीतर्फे करण्यात आले आहे.