ओरोस-गावडेवाडीत उद्यापासून
शिखर कलशारोहण सोहळा

सकाळ वृत्तसेवा
सिंधुदुर्गनगरी, ता. २३ ः ओरोस-गावडेवाडी (ता. कुडाळ) येथील श्री देवी भवानी मंदिराचा शिखर कलशारोहण व मूर्ती पुनःप्रतिष्ठापना सोहळा २५ ते २८ नोव्हेंबर दरम्यान उत्साहात होणार आहे. यानिमित्त विविध धार्मिक कार्यक्रम होणार असून त्यांचा भाविकांनी लाभ घ्यावा, असे आवाहन श्री कुलस्वामिनी भवानी देवी उत्सव मंडळ, उत्कर्ष भजन मंडळ गावडेवाडी व सर्व तावडे परिवाराने केले आहे.
मंदिर परिसरात चार दिवस विविध धार्मिक विधी, पूजा-अर्चा, कलशयात्रा, होम-हवन, ग्रहशांती, मंडप प्रवेश, जलाधिवास, शिखरारोहण आदी कार्यक्रम होतील. भक्तांसाठी दर्शन व पूजाविधीची विशेष व्यवस्था केली आहे. सोहळ्याची सुरुवात मंगळवारी (ता. २५) होणार असून देवी भवानी मातेची मूर्तीची सवाद्य मिरवणूक व सभामंडप शुद्धीची विधी, २६ ला कलशयात्रा, मंडप प्रवेश, गणेशपूजन, मंडप देवता स्थापना, जलाधिवास, ग्रहशांती व विविध पूजा-अर्चा, २७ ला देवतांची स्थापना, प्रसाद, स्थापत्य, होमहवन आदी आध्यात्मिक विधी, तर २८ ला सोहळ्याच्या मुख्य दिवशी सकाळी संकल्प, देवतापूजन, शिखरारोहण, ११ वाजता देवीची मूर्ती पुनःप्रतिष्ठापना, होमहवन, तत्त्व होम, गुणहोम, बलिदान, महापूजा, आरती व महाप्रसादाचे आयोजन केले आहे.