07793

निगुडेतील विहीर कामामध्ये
अनियमितता, चौकशी करा

गवंडे ः ..अन्यथा उपोषण छेडू

सकाळ वृत्तसेवा
बांदा, ता. १ ः निगुडे-तेलवाडी येथील सार्वजनिक विहिरीवरील लोखंडी जाळी बसविणे व गाळ काढणे या कामात अनियमितता व भ्रष्टाचार झाल्याचा आरोप निगुडे ग्रामपंचायतीचे माजी उपसरपंच गुरुदास गवंडे यांनी केला आहे. या कामाची खातेनिहाय चौकशी करून कार्यवाही न झाल्यास १४ डिसेंबरला उपोषणास बसू, असा इशारा त्यांनी दिला.
गवंडे यांनी दिलेल्या प्रसिद्धी पत्रकात म्हटले आहे की, २०२२-२३ मध्ये १५ व्या वित्त आयोगातून ७० हजार रुपये एवढी रक्कम या कामासाठी मंजूर झाली होती. मात्र, प्रत्यक्षात दोन वर्षांनंतरही काम सुरू झाले नव्हते. या दिरंगाईचा निषेध म्हणून ११ मार्चला ग्रामपंचायत कार्यालयासमोर उपोषण सुरू केले होते. त्यानंतर कामाची निविदा निघाली व एप्रिल २०२५ अखेरपर्यंत काम पूर्ण करायचे होते. मात्र, संबंधित ठेकेदाराने ऑगस्टमध्ये काम पूर्ण केले. मात्र, यामध्ये बसविलेली लोखंडी जाळी केवळ दोन महिन्यांतच पूर्ण गंजून निकामी झाली. शिवाय अंदाजपत्रकात नमूद केल्याप्रमाणे चॅनल बसविण्याचे कामही अपूर्ण राहिल्याचे गवंडे यांनी निदर्शनास आणून दिले. तक्रारीनंतर ग्रामीण पुरवठा विभागाने पाहणी करून चॅनल बसविले. या सर्व अनागोंदी कारभारास ग्रामपंचायत सरपंच जबाबदार असल्याचा आरोप गवंडे यांनी केला आहे. यासंदर्भात श्री. गवंडे यांनी गटविकास अधिकारी, पंचायत समिती सावंतवाडी यांच्याकडे लेखी तक्रार दाखल केली असून कामाची खातेनिहाय चौकशी व अंदाजपत्रकाप्रमाणे दुरुस्ती न झाल्यास १४ ला पंचायत समिती कार्यालयासमोर उपोषण करण्याचा इशारा त्यांनी दिला आहे.