करंजाणीत हिवाळी श्रमसंस्कार शिबिर
दापोली, ता. २ ः एन. के. वराडकर महाविद्यालयाच्या राष्ट्रीय सेवा योजना विभागातर्फे करंजाणी येथे विशेष हिवाळी श्रमसंस्कार निवासी शिबिर उत्साहात झाले.
शिबिरादरम्यान महाविद्यालयाचे माजी विद्यार्थी आणि सध्या कोकण कृषी विद्यापीठात कृषी सहाय्यक म्हणून कार्यरत असलेले श्रीकृष्ण गंगावणे यांनी भेट देत विद्यार्थ्यांशी संवाद साधला व प्रेरणादायी मार्गदर्शन केले. राष्ट्रविकासातील युवकांची भूमिका या विषयावर त्यांनी विनोदी, मार्मिक आणि प्रभावी कवितांच्या माध्यमातून विद्यार्थ्यांना सामाजिक, आर्थिक, मानसिक, बौद्धिक आणि शारीरिक विकासाचे महत्त्व समजावून सांगितले.
शिबिरादरम्यान विद्यार्थ्यांनी करंजाणी आणि परिसरातील पाणीप्रश्न सोडवण्यासाठी दोन दिवसांत १९ बंधारे बांधण्याचे विक्रमी कार्य केले. करंजाणी गावात १० आणि उघडा मारुती परिसरात नऊ असे एकूण १९ बंधारे विद्यार्थ्यांनी गावकऱ्यांच्या सहकार्याने उभारले. सरपंच लहू साळवी, माजी सभापती प्रकाश कालेकर, महाळुंगा विकास समितीचे अध्यक्ष तानाजी कालेकर, उपसरपंच समीक्षा कालेकर, तंटामुक्ती अध्यक्ष अंतोष कालेकर, पोलिस पाटील मयूर विटले, ग्रामसेवक रूपेश शिंदे, माजी सरपंच जयवंत कालेकर, माजी उपसरपंच विकास कालेकर, रवींद्र कालेकर, अनिशा कालेकर, सीमा कालेकर यांनी सहकार्य केले.