विद्यार्थ्यांनी हात केला की एसटी थांबणार
एसटी चालक, वाहकांवर कारवाईचे आदेश ; तक्रारीची सोय
सकाळ वृत्तसेवा
चिपळूण, ता. ६ : महाराष्ट्र राज्यमार्ग परिवहन महामंडळाच्या साध्या, मध्यम व लांब पल्ल्याच्या बसमधून शालेय विद्यार्थी प्रवास करू शकणार आहेत. परिवहनमंत्री प्रताप सरनाईक यांनी या माध्यमातून विद्यार्थ्यांना मोठा दिलासा दिला आहे.
आता शाळा-कॉलेजच्या विद्यार्थ्यांनी हात करूनही गाडी न थांबल्यास विद्यार्थी १८००२२१२५१ या हेल्पलाइन क्रमांकावर संपर्क साधू शकतील. तक्रारीची खात्री करून संबंधित चालक, वाहक व आगारप्रमुखांवर कारवाई केली जाणार आहे. परिवहन महामंडळाने १५ दिवसांपूर्वी शालेय विद्यार्थ्यांसाठी खास हेल्पलाइन उपलब्ध करून दिली होती. त्यावर राज्यभरातून ३३४ तक्रारी प्राप्त झाल्या आहेत. त्यात सर्वाधिक ५२ तक्रारी सोलापूर विभागातून प्राप्त झाल्या आहेत. त्यामध्ये वेळेवर बस येत नाही, हात केला तर बस थांबत नाहीत, थांबा असूनही त्या ठिकाणी बस थांबत नसल्याचे सांगितले जाते, अशा त्या तक्रारी आहेत तसेच शालेय पास असूनही विद्यार्थ्यांना प्रवेश नाकारला जातो, अशाही तक्रारी आहेत. या तक्रारींची गंभीर दखल परिवहनमंत्री प्रताप सरनाईक यांनी घेतली आहे. तक्रारींच्या अनुषंगाने लवकर कार्यवाही तथा सुधारणा करावी अन्यथा शालेय विद्यार्थ्यांचे शैक्षणिक नुकसान होत असल्यास संबंधित आगार व्यवस्थापक व पर्यवेक्षकांना निलंबित करण्यात येईल, असेही त्यांनी स्पष्ट केले आहे.
-----------
कोट
शालेय विद्यार्थ्यांसाठी साध्या, मध्यम व लांब पल्ल्याच्या एसटीमधूनही प्रवास करता येतो. अधिकृत थांब्याच्या ठिकाणी विद्यार्थी असतील तर त्यांनी हात केल्यावर चालकांनी गाडी थांबवावी, अशा सूचना सर्वांना दिल्या आहेत.

- दीपक चव्हाण, आगारप्रमुख चिपळूण