सारंग बौद्धवाडीमध्ये
एकाची आत्महत्या
दापोली, ता. ९ : दापोली तालुक्यातील सारंग परिसरात एका तरुणाने घरात गळफास घेऊन आत्महत्या केल्याची धक्कादायक घटना उघडकीस आली. रूपेश दामू मोहिते (वय ४०, रा. सारंग-बौद्धवाडी) असे मृत तरुणाचे नाव आहे. दोन–तीन दिवसांपासून रूपेश घरात एकटाच होता. त्याच्या घरात दोन दिवसांपासून लाईट दिसत नसल्याने शेजाऱ्यांना संशय आला. याबाबत ग्रामस्थ राहुल बाळाराम मोहिते यांनी नातेवाईक वसंत गंगाराम मोहिते यांनी फोन करून माहिती दिली. त्यानंतर वसंत मोहिते, सुनील गमरे आदी ग्रामस्थांनी रूपेशच्या घराकडे धाव घेतली. दरवाजास जोराचा धक्का देताच तो उघडला आणि आत गेल्यावर हॉललगतच्या खोलीत लाकडी शिडी दिसून आली. त्यावरून पुढे पाहणी केली असता पत्र्याच्या लोखंडी अँगलला नायलॉनच्या दोरीने गळफास घेतलेला रूपेश आढळला. ग्रामस्थांनी तत्काळ त्याला दापोली उपजिल्हा रुग्णालयात नेले; मात्र वैद्यकीय अधिकाऱ्यांनी तपासणीअंती त्याला मृत घोषित केले. घटनेची माहिती मिळताच पोलिस पाटील सुचिता पेंढारी यांनी दापोली पोलिसांसह घटनास्थळी धाव घेऊन पंचनामा केला.