‘शाळा वाचवा, शिक्षण वाचवा’
मंचचे बुधवारी धरणे आंदोलन
सकाळ वृत्तसेवा
सिंधुदुर्गनगरी, ता. १०ः शासनाच्या १५ मार्च २०२४ च्या निर्णयामुळे विद्यार्थ्यांचे शैक्षणिक व गुणवत्तापूर्ण शिक्षण प्राप्त होणे या अधिकाराचे उल्लंघन होणार आहे. हा शासन निर्णय रद्द करावा, या मागणीसाठी तसेच या अन्यायकारी शासन निर्णयाविरोधात शाळा वाचवा शिक्षण वाचवा मंच सिंधुदुर्गच्या वतीने बुधवारी (ता. १७) जिल्हाधिकारी कार्यालयासमोर धरणे आंदोलन करण्यात येणार आहे.
याबाबत जिल्हाधिकाऱ्यांना दिलेल्या निवेदनात म्हटले आहे की, शासनाच्या १५ मार्च २०२४ च्या निर्णयाने सिंधुदुर्ग जिल्ह्यातील ९१ माध्यमिक शाळा व शेकडो प्राथमिक शाळा बंद होणार आहेत. या शाळातील शिक्षकांचे समायोजन करण्याचे शासनाने ठरविले आहे. शिक्षकांचे समायोजन होऊन शिक्षकांची नोकरी टिकून राहील, याची शासन हमी देत असले तरी शिक्षण प्रक्रियेतील महत्त्वाचा घटक असलेला विद्यार्थी मात्र या निर्णयाने भरडला जाणार आहे. वास्तविक शिक्षण हक्क (आरटीई) कायद्यान्वये एक कि.मी.च्या परिघात प्राथमिक शिक्षण व तीन कि.मी.च्या परिघात माध्यमिक शिक्षण विद्यार्थ्यास मिळणे आवश्यक आहे. शासन निर्णयामुळे विद्यार्थ्यांचे शैक्षणिक हक्क व गुणवत्तापूर्ण शिक्षण प्राप्त होणे या अधिकाराचेच उल्लंघन होणार आहे. यासाठी अन्यायकारी शिक्षण धोरणाविरोधात आणि शाळा व शिक्षण वाचविण्यासाठी १५ मार्च २०२४ शासन निर्णय रद्द करा, या मागणीकरिता बुधवारी (ता. १७) जिल्हाधिकारी कार्यालयासमोर धरणे आंदोलन करणार असल्याची माहिती जिल्हाध्यक्ष संजय वेतुरेकर यांनी दिली.