10556

स्पर्धा परीक्षेत यशासाठी हवी शिस्त

सूरज दुबाजे ः कणकवली कॉलेजमध्ये मार्गदर्शन कार्यशाळा

सकाळ वृत्तसेवा
कणकवली, ता. १५ : स्पर्धा परीक्षा या केवळ ज्ञानाची चाचणी नसून दृष्टी, दृष्टिकोन, शिस्त, सातत्य, आणि मनोबल यांचा दिव्य एकसंघ प्रवास आहे. विद्यार्थ्यांना योग्य अभ्यास पद्धती, कौशल्य विकास, रणनीती, मानसिक तयारी केल्‍यास त्‍यांना निश्‍चितपणे प्रशासकीय क्षेत्रात संधी मिळू शकतात, असे प्रतिपादन उद्योजकता मार्गदर्शन अधिकारी सूरज देबाजे यांनी यावेळी केले.
येथील कणकवली कॉलेजमध्ये वाणिज्‍य विभाग, स्पर्धा परीक्षा मार्गदर्शन केंद्र यांच्या वतीने एकदिवसीय युपीएससी, एमपीएससी स्पर्धा परीक्षा मार्गदर्शन कार्यशाळा झाली. यात उद्योजकता मार्गदर्शन अधिकारी सूरज देबाजे यांनी मार्गदर्शन केले.
या कार्यशाळेत श्री. देबाजे यांनी स्पर्धा परीक्षांसाठी पूर्व, मुख्य परीक्षा आणि मुलाखत याची तयारी कशी करावी, त्याचा अभ्यासक्रम, परीक्षेचे स्वरूप, अभ्यासक्रम, वारंवार विचारले जाणारे प्रश्न, प्रश्नपत्रिकांचे विश्लेषण याबाबत विस्तृत मार्गदर्शन केले. कार्यक्रमाच्या अध्यक्षस्थानी महाविद्यालयाचे प्राचार्य युवराज महालिंगे म्हणाले की, ‘आजच्या युगात शासकीय व निमशासकीय सेवांमध्ये विद्यार्थ्यांना रोजगाराच्या प्रचंड संधी उपलब्ध आहेत. मात्र, या स्पर्धा परीक्षांसाठी योग्य मार्गदर्शन, अभ्यासाची दिशा आणि सततची सराव परीक्षा आवश्यक असते. भविष्यात कोकणातून आणि विशेषतः सिंधुदुर्ग जिल्ह्यातून अनेक क्लास वन अधिकारी निर्माण होतील.’ याप्रसंगी डॉ. राजेंद्र मुंबरकर, प्रा.पी.बी. कडूकर, प्रा. लक्ष्मण राठोड, प्रा. सुयश जाधव उपस्थित होते. स्पर्धा परीक्षा मार्गदर्शन केंद्राचे समन्वयक डॉ. रामदास बोलके यांनी प्रास्ताविक केले. प्रा. संदीप तेली यांनी परिचय केला. डॉ. मारोती चव्हाण यांनी सूत्रसंचालन केले. प्रा. नीलेश खुटाळे यांनी आभार मानले.