10778

चिंदरकरांचा निःस्वार्थ सेवाभाव आदर्शवत

शलाका रावले ः वराड येथे ‘समाजसेवक’ पुरस्कार प्रदान सोहळा

सकाळ वृत्तसेवा
ओरोस, ता. १५ ः गावात निःस्वार्थी भावनेने काम करणारे व्यक्तिमत्व म्हणून चिंदरकर यांची ओळख आहे. त्यांचा सन्मान म्हणजे आमच्या गावाचा सन्मान आहे, असे प्रतिपादन सरपंच शलाका रावले यांनी पुरस्कार प्रदान कार्यक्रमात केले. यावेळी बॅ. नाथ पै सेवांगणच्या वतीने देण्यात येणारा (कै.) मधू वालावलकर समाजसेवक पुरस्कार वराड भंडारवाडी येथील रहिवासी, समाजसेवक विद्याधर चिंदरकर यांना प्रदान करण्यात आला.
वराड महापुरुष मंदिर येथे आयोजित कार्यक्रमास ग्रामस्थ, महिला, ज्येष्ठ मंडळी, युवा कार्यकर्ते, व्यापारी, विद्यार्थी उपस्थित होते. यावेळी शाल, श्रीफळ, पुष्पगुच्छ, सन्मानपत्र, सन्मानचिन्ह व रोख रक्कम देऊन चिंदरकर यांचा सन्मान करण्यात आला. चिंदरकर यांच्या समाजकार्याच्या सन्मानार्थ त्यांना हा पुरस्कार प्रदान करण्यात आला.
कार्यक्रमाच्या प्रारंभी विकास म्हाडगुत यांनी मान्यवरांचे गुलाब पुष्प देऊन स्वागत केले. यावेळी किशोर शिरोडकर यांनी सन्मानपत्राच वाचन केले. कार्यक्रमास प्रमुख पाहुणे म्हणून सरपंच रावले, इतिहास संशोधक डॉ. ज्योती तोरसकर, स. का. पाटील सिंधुदुर्ग कॉलेज मालवणच्या सहयोगी प्राध्यापक डॉ. सुमेधा नाईक, दीपक भोगटे, मधू सावंत, बाळू वराडकर, दत्तात्रय टेमकर, बबन पांचाळ, सुनील नाईक, श्वेता तेंडुलकर, वराड शाळा मुख्याध्यापिका श्रीमती मयेकर, आनंद धुत्रे आदी उपस्थित होते.
डॉ. तोरसकर यांनी, चिंदरकर यांच्यासारखे समाजसेवेचे गुण सर्वांमध्ये यावेत, असा आशावाद व्यक्त केला. प्रा. डॉ. नाईक यांनी, प्रत्येक गावात, प्रत्येक वाडीत चिंदरकरांसारखा समाजसेवक असावा, अशा शब्दांत अभिनंदन केले. मधू सावंत, बाळू वराडकर, दत्तात्रय टेमकर, बबन पांचाळ, सुनील नाईक, श्वेता तेंडुलकर, आनंद धुत्रे यांनी मनोगते व्यक्त केले. यावेळी गावातील वयोवृद्धांचा सेवांगणाच्या वतीने शाल व श्रीफळ देऊन सत्कार करण्यात आला. दीपक भोगटे यांनी प्रास्ताविक केले. ॲड. प्रदीप मिठबावकर यांनी सूत्रसंचालन केले. या कार्यक्रमास कट्टा बाजारपेठ व परिसरातील ग्रामस्थ, सेवांगणचे कर्मचारी उपस्थित होते.