सत्यसाई सेवासमितीतर्फे
अभंग, चित्रकला स्पर्धा
रत्नागिरी, ता. १५ : श्री सत्य साईबाबा जन्मशताब्दी वर्षानिमित्त जगभरात विविध धार्मिक व सामाजिक कार्यक्रमांचे आयोजन केले जात आहे. त्याचाच एक भाग म्हणून येथील श्री सत्यसाई सेवासमितीतर्फे ११ जानेवारी रोजी श्री सत्यसाई भजन व अभंग स्पर्धा व चित्रकला स्पर्धेचे रत्नागिरीत आयोजन केले आहे.
गेल्या २३ नोव्हेंबरपासून जन्मशताब्दी वर्ष सुरू झाले. श्री सत्यसाई भजने ही सर्व देवतांवरची छोटी भजने असून, त्यामध्ये पूर्णपणे नामसंकीर्तन किवा बोध आहे. अशा सुंदर हजारो भजनांची ओळख रत्नागिरीतील पाचवी ते दहावी वयोगटातील छोट्या भजनप्रेमींना व्हावी, हा स्पर्धेमागील उद्देश आहे, असे सेवासमितीचे प्रमुख भूषण बेलवलकर यांनी सांगितले. दोनही स्पर्धेत पहिल्या तीन यशस्वी स्पर्धकांना रोख पारितोषिक व करंडक देऊन गौरवण्यात येईल. या स्पर्धेसाठी कोणतेही प्रवेशशुल्क नाही. चित्रकला स्पर्धेच्या नियमावलीसाठी रूपेश पंगेरकर, भूषण बेलवलकर यांच्याशी संपर्क साधवा.