rat17p16.jpg-
11284
हातिसः येथे क्रीडा स्पर्धांच्या उद्घाटनप्रसंगी हातिस ग्रामविकास मंडळाचे अध्यक्ष डॉ. दिलीप नागवेकर यांचा सन्मान करताना केंद्रप्रमुख दीपक माळी. सोबत दीपक आंबुलकर, देवीप्रसाद नागवेकर, अविश पाटील, विजय नागवेकर आदी.

हातिस येथे क्रीडा स्पर्धा उत्साहात
रत्नागिरी, ता. १७ : विद्यार्थ्यांनी जीवनात यशस्वी होण्यासाठी शिक्षणाबरोबरच उत्तम आरोग्यासाठी खेळाची साथ धरावी, असे प्रतिपादन हातिस ग्रामविकास मंडळाचे अध्यक्ष डॉ. दिलीप नागवेकर यांनी केले. जिल्हा परिषद, पोमेंडी केंद्राच्या हिवाळी क्रीडा स्पर्धा हातिस येथे उत्साही वातावरणात झाल्या. त्या वेळी ते बोलत होते.
मंडळाचे कार्याध्यक्ष दीपक आंबुलकर, सचिव देवीप्रसाद नागवेकर, अविश पाटील, माजी अध्यक्ष विजय नागवेकर, पोलिस पाटील संतोष नागवेकर, मानकरी प्रमोद नागवेकर, जयवंत नागवेकर, रूपेश नार्वेकर, राजेंद्र नागवेकर आदी उपस्थित होते. स्पर्धा यशस्वी करण्यासाठी उत्तम योगदान दिल्याबद्दल पोमेंडी केंद्रप्रमुख यांच्यावतीने ग्रामविकास मंडळ हातिस यांचा सन्मान करण्यात आला.
पोमेंडी केंद्रप्रमुख दीपक माळी यांच्या अध्यक्षतेखाली केंद्रस्तरीय क्रीडा स्पर्धेत पोमेंडी बु. नं. १, सोमेश्वर मराठी, चिंचखरी, तोणदे, टेंभ्ये नं. १, २, आगाशेकोंड, सोमेश्वर उर्दू, हातिस, बागपाटोळे, बाणेवाडी या शाळांतील विद्यार्थी सहभागी झाले. स्पर्धेत कबड्डी, खो-खो, लंगडी, गोळाफेक, थाळीफेक, लांब उडी, उंच उडी, धावणे हे क्रीडाप्रकार खेळवले गेले. सांघिक सर्वसाधारण विजेतेपद तोणदे शाळेने पटकावले.