rat17p32.jpg-
O11374
लांजा- शहरातून जाणाऱ्या महामार्गावरील उड्डाणपुलाचे काम प्रगतीपथावर.

लांजा येथील उड्डाणपुलाचे काम प्रगतीपथावर
मुंबई-गोवा महामार्ग; कोर्लेतिठा येथे गर्डरसह स्लॅबचे काम पूर्ण
सकाळ वृत्तसेवा
लांजा, ता. १७ः गेल्या पंधरा वर्षाहून अधिक काळ रखडलेल्या मुंबई-गोवा महामार्गावरील लांजा शहरातील उड्डाणपुलाचे काम सद्यःस्थितीत वेगाने सुरू आहे. कोर्लेतिठा ते पुढील काही अंतरापर्यत गर्डर टाकून त्यावर स्लॅबही टाकण्यात आला आहे. त्यामुळे हे काम लवकरच पूर्ण होईल आणि हा मार्ग वाहतुकीस खुला होईल, अशी शक्यता आहे. सध्या या ठिकाणी काम सुरू असल्याने वाहनचालकांची गैरसोय होत आहे.
लांजा शहरातून जाणाऱ्या मुंबई-गोवा महामार्गाचे काम गेल्या अनेक वर्षांपासून रखडले होते. चौपदरीकरणातील लांजा टप्प्यात शहरातील संत निरंकारी सत्संग भवन ते एसटी डेपोपर्यंत उड्डाणपूल उभारण्यात येत आहे. साधारणपणे या पुलाची लांबी ९७५ मीटर, तर रूंदी २५ मीटरइतकी आहे. या पुलासाठी एकूण ५० पिलर उभारण्यात आले असून, लांजा शहरातील संत निरंकारी सत्संग भवन येथून या पुलाचे काम सुरू आहे. त्यामध्ये पूल उभारणीत २० मीटरचे गाळे ठेवण्यात आले असून, पिलरची उंची साडेपाच मीटर आहे. या उड्डाणपुलावर ३९२ गर्डर बसवण्यात येणार आहेत, अशी माहिती राष्ट्रीय महामार्गाच्या ठेकेदार कंपनीकडून देण्यात आली.
उड्डाणपुलाचे पिलर उभारल्यानंतर त्यावर पहिला गर्डर ६ जून रोजी सकाळी कोर्लेतिठा येथून टाकण्यास सुरवात झाली. त्यानंतर हे काम वेगाने सुरू आहे. या कामामध्ये पावसाळ्यात अडथळा निर्माण झाला होता. अतिवृष्टीवेळी काही स्थानिक नागरिकांचेही नुकसान झाले होते. नियोजनाचा अभाव असल्याचा ठपका स्थानिक नागरिकांनी ठेवलेला होता. त्यावरून ठेकेदार विरूद्ध नागरिक असे वातावरण होते. त्याही परिस्थितीत मंदगतीने काम सुरू होते. पाऊस थांबल्यानंतर या कामाला वेग आलेला आहे. सध्या पिलरचे काम पूर्ण झाले असून, गर्डर चढवण्यात येत आहेत. कोर्लेतिठ्यापासून पुढील काही अंतरापर्यंत गर्डर टाकून पूर्ण झाले असून, त्यावरील स्लॅबचेही काम पूर्ण होत आलेले आहे.
दरम्यान, केंद्रीय मंत्री नितीन गडकरी यांनी दिलेल्या अंतिम मुदतीमध्ये हे काम पूर्ण होईल, अशी अपेक्षा पर्यटकांसह स्थानिक नागरिकांना आहे. उड्डाणपुलावरील गर्डर आणि स्लॅब टाकत असतानाच नियमित रस्ता जोडण्याचेही काम हाती घेतलेले आहे. सध्या रत्नागिरी ते लांजा या टप्प्यात लांजा शहरातील उड्डाणपूल परिसरात वाहतुकीला अडथळा निर्माण होत आहे. सकाळी आणि सायंकाळी येथे वाहतूककोंडीही होत असते.

कोट
लांजा शहरातील उड्डाणपुलाच्या विलंबामुळे लांजा शहरात मोठ्या प्रमाणात ट्राफिक जाम होत आहे. संबंधित कंपनीने लवकरात लवकर हा उड्डाणपूल पूर्णत्वास नेणे गरजेचे आहे.
- दत्ता कदम, जिल्हाप्रमुख, ठाकरे शिवसेना