टेम्पो - रिक्षा धडकेत
दोन जखमी, चालक बचावला
सकाळ वृत्तसेवा
संगमेश्वर, ता. १७ ः नायरी मार्गावर आज सकाळी ९ वा. च्या सुमारास आयशर टेम्पो आणि रिक्षाची समोरासमोर धडक बसली. यामध्ये रिक्षातील दोन प्रवासी जखमी झाले असून, चालक थोडक्यात बचावला आहे. या अपघातात रिक्षाचे मोठे नुकसान झाले आहे. रिक्षातील जखमींना संगमेश्वर ग्रामीण रुग्णालयात हलवण्यात आले आहे.
आज बुधवारी सकाळी नऊच्या सुमारास रत्नागिरीहून नायरी बाजारासाठी मच्छी घेऊन जाणारा टेम्पो (एमएच ०८ एच २७३९) नायरी रोडला कळंबस्तेपासून दोन किमी अंतरावर कातकरी आंब्याच्या पुढे आला असता शृंगारपूरहून प्रमोद म्हस्के हे आपल्या ताब्यातील रिक्षा (क्र. एमएच ०८ एओ ५९६५ ) संगमेश्वरला जात असता वरील ठिकाणी रिक्षा आणि टेम्पोची समोरासमोर धडक झाली. या अपघातात दोन प्रवासी जखमी झाले असून, रिक्षाचे नुकसान झाले आहे. जखमींना तत्काळ संगमेश्वर ग्रामीण रुग्णालयात दाखल करण्यात आले आहे. अपघाताची खबर संगमेश्वर पोलिसांना देण्यात आली आहे.