खाडीत पडल्याने
कर्मचाऱ्याचा मृत्यू
राजापूरः जैतापूर येथील तुळसुंदे जेटीजवळ एका मच्छीमार बोटीवर काम करणाऱ्या आचारी कामगाराचा खाडीच्या पाण्यात तोल जाऊन बुडाल्याने दुर्दैवी मृत्यू झाला आहे. ही घटना १५ डिसेंबर रोजी सकाळी पावणे नऊच्या सुमारास घडली. या घटनेमुळे परिसरात हळहळ व्यक्त होत आहे.
याबाबत मिळालेल्या माहितीनुसार, सीताराम सखाराम कुळये (६०, रा. वडदहसोळ भू, ता. राजापूर) हे खबर देणारे वजूद आदम बेबजी यांच्या मालकीच्या मच्छीमारी बोटीवर आचारी म्हणून कामाला होते. ही बोट तुळसुंदे जेटीच्या समोरील बाजूस खाडीत नांगरून उभी होती. १५ डिसेंबर रोजी सकाळी कुळये हे शौचास बोटीच्या कडेला बसले असता अचानक त्यांचा तोल गेला आणि ते खाडीच्या पाण्यात पडले. पाण्यात पडल्यामुळे ते बुडाले, हे लक्षात येताच त्यांच्यासोबत असलेल्या सहकाऱ्यांनी तत्काळ होडीच्या सहाय्याने त्यांना पाण्यातून बोटीत घेतले आणि तुळसुंदे जेटीवर आणले. जेटीवर आणले तेव्हा कुळये पूर्णपणे बेशुद्ध पडले होते. त्यांना तातडीने पुढील उपचारांसाठी प्राथमिक आरोग्यकेंद्र, जैतापूर येथे नेण्यात आले; मात्र, तेथील डॉक्टरांनी तपासणी केल्यानंतर त्यांना मृत घोषित केले.
--------
टेम्पो-दुचाकी
धडकेत एक जखमी
राजापूर ः मुंबई-गोवा महामार्गावर तालुक्यातील ओणी पेट्रोलपंपासमोर टेम्पोने दुचाकीला धडक दिल्याने झालेल्या अपघातात हरेश भितळे (३६, मंदरूळ, गणेशवाडी) हे जखमी झाले आहेत. काल (ता.१६) सायंकाळी ६ वा. हा अपघात घडला. या प्रकरणी वैभव शांताराम मासये यांनी राजापूर पोलिसात फिर्याद दाखल केली आहे. भितळे हे ओणी येथून मुंबई-गोवा महामार्गाने तिवंदामाळ येथे त्यांच्या ताब्यातील दुचाकीवरून (एमएच ०८ बीजे १७७५) जात असताना समोरून विरूद्ध दिशेने येणाऱ्या टेम्पोवरील (एमएच ०४ बीयु ३२४२) चालकाने ओणी पेट्रोलपंपासमोर रस्त्याच्या विशिष्ट परिस्थितीकडे लक्ष दिलेले नाही. त्यामुळे हा अपघात झाला. या अपघातात हरेश भितळे जखमी झाले असून, दुचाकीचेही नुकसान झाले आहे. या प्रकरणी राजापूर पोलिसांनी टेम्पोचालक हुसेन अब्दुल पाटणकर (वाकेड, खालचीवाडी, लांजा) यांच्या विरोधात गुन्हा दाखल केला आहे.