किरकोळ कारणातून
तरुणास दांडक्याने मारहाण
रत्नागिरी : शहरातील कोकणनगर येथे किरकोळ कारणातून एकास तिघांनी लाकडी दांडक्याने मारहाण केल्याची घटना बुधवारी (ता. १७) सकाळी घडली. शैनाज समीर सोलकर, समीर सोलकर आणि साहिल समीर सोलकर (तिन्ही रा. शेट्येनगर, रत्नागिरी) अशी गुन्हा दाखल करण्यात आलेल्या संशयितांची नावे आहेत. त्यांच्या विरोधात अब्दुल मतिन हसनमियाँ डोंगरकर (३८, रा. कोकणनगर झोपडपट्टी, रत्नागिरी) याने शहर पोलिस ठाण्यात फिर्याद दिली आहे. त्यानुसार, फिर्यादीच्या घराशेजारी संशयिताच्या घराचे काम सुरू आहे. बुधवारी सकाळी फिर्यादी हा आपल्या घराबाहेर पायरीवर चहा पित बसलेला होता. त्यावेळी तिन्ही संशयित तिथे आले. त्यांनी फिर्यादीला आमच्या घराचे काम करण्यासाठी सामान येणार आहे, तुझी मोटार बाजूला कर, असे सांगितले. त्यावर फिर्यादीने त्यांना माझी मोटार बाजुलाच आहे, तुम्ही तुमचे काम करा, असे बजावले. त्यावर संशयित साहिल सोलकरने दगड उचलून फिर्यादीला शिवीगाळ करत धमकी दिली. त्यानंतर संशयित शैनाज सोलकर, समीर सोलकर यांनीही फिर्यादीला शिवीगाळ करत त्याला मारहाण केली. या घटनेत फिर्यादीवर जिल्हा शासकीय रुग्णालयात उपचार सुरू असून अधिक तपास शहर पोलिस करत आहेत.

कारवांचीवाडीतील जुगार
अड्ड्यावर कारवाई
रत्नागिरी ः शहराजवळील कारवांचीवाडी येथे बेकायदा जुगार अड्डा चालवणाऱ्या विरोधात ग्रामीण पोलिस ठाण्यात गुन्हा दाखल करण्यात आला आहे. ही कारवाई बुधवारी (ता. १७) सकाळी ११ वाजता करण्यात आली. प्रभाकर भिकाजी कांबळे (५३, रा. कांबळेवाडी, कारवांचीवाडी, रत्नागिरी) असे गुन्हा दाखल करण्यात आलेल्या संशयिताचे नाव आहे. त्याच्याविरोधात पोलिस हेड कॉन्स्टेबल भैरवनाथ सवाईराम यांनी तक्रार दिली आहे. बुधवारी सकाळी संशयित हा कारवांचीवाडी येथील कॅफेच्या पाठीमागे एका पडक्या शेडमध्ये बेकायदा कल्याण मटका जुगार चालवत होता. त्याच्याकडून रोख रक्कम आणि जुगाराचे साहित्य असा एकूण ८६० रुपयांचा मुद्देमाल जप्त करण्यात आला आहे.