11604

एसटीच्या धडकेत
दुचाकीस्वार ठार
खेड-मंडणगड मार्गावर घटना; वाहतूक विस्कळीत
खेड, ता. १८ : खेड-मंडणगड मार्गावर भिलारे-आयनी गावाजवळ एसटी आणि दुचाकीच्या समोरासमोर झालेल्या जोरदार धडकेत आयनी चव्हाणवाडी येथील दुचाकीस्वार जागीच ठार झाला. हा अपघात गुरुवारी (ता. १८) दुपारी ३ वाजण्याच्या सुमारास घडला. विलास कोरपे (रा. आयनी, चव्हाण वाडी, खेड) असे मृत स्वाराचे नाव आहे.
मिळालेली माहिती अशी, विलास हे खेड येथून आयनीकडे दुचाकीवरून जात होते. त्याचवेळी मंडणगडहून खेडकडे येणाऱ्या एसटीशी समोरासमोर धडक झाली. त्यामध्ये विलास कोरपे यांचा घटनास्थळीच मृत्यू झाला. हा अपघात दुपारच्या सुमारास झाला. या अपघाताची माहिती मिळताच नरेंद्र महाराज संस्थानची रुग्णवाहिका तातडीने घटनास्थळी दाखल झाली. या घटनेनंतर मार्गावरील वाहतूक काहीवेळ विस्कळीत झाली होती. स्थानिक ग्रामस्थांनी एकत्र येऊन रस्ता मोकळा करून वाहतूक सुरळीत केली. याप्रकरणी पोलिस ठाण्यात गुन्हा दाखल करण्याची प्रक्रिया रात्री उशिरापर्यंत सुरू होती.