‘विद्यार्थी गोडबोले पुरस्कार’
मेघन गणपत्येला जाहीर
सकाळ वृत्तसेवा
चिपळूण, ता. २० : चतुरंग प्रतिष्ठानतर्फे दरवर्षी दहावीतील गुणवंत विद्यार्थ्यांना दिला जाणारा मानाचा ‘सर्वोत्तम विद्यार्थी गोडबोले पुरस्कार’ यंदा विद्याभारतीच्या मेघन गणपत्ये याला जाहीर झाला. या पुरस्काराचे हे २५वे वर्ष आहे.
रत्नागिरी जिल्ह्यातील विविध शाळांमधील निवडक २४५ विद्यार्थ्यांमधून ३६ विद्यार्थ्यांची यावर्षी या पुरस्कारासाठी निवड झाली. मेघन हा गुरुकुलमधील गुणवंत विद्यार्थी असून, त्याच्यातील बहुविध कलागुण आणि मनमिळाऊ स्वभाव ही त्याची वैशिष्ट्ये आहेत. त्याने चित्रकलेच्या दोन्ही परीक्षांमध्ये उत्तम गुण मिळवले आहेत तसेच अखिल भारतीय गांधर्व महाविद्यालयातर्फे घेण्यात येणाऱ्या तबल्याच्या पहिल्या दोन्ही परीक्षांमध्ये त्याने उत्तम श्रेणी मिळवली आहे. मेघन उत्तम पेटीवादकही आहे.
मेघनला पाचवी व आठवीत शिष्यवृत्ती मिळाली असून, होमी भाभा बालवैज्ञानिक स्पर्धेत त्याने यश संपादन केले आहे याशिवाय जिल्हास्तरीय मॉडर्न पेंटॅथलॉन स्पर्धेत त्याने पाचवा क्रमांक मिळवला आहे. अभ्यासासोबत विविध कलाप्रकारांतील उल्लेखनीय कामगिरी आणि प्रत्यक्ष मुलाखतीतील प्रभावी सादरीकरणाच्या आधारे त्याची ‘सर्वोत्तम विद्यार्थी’ पुरस्कारासाठी निवड करण्यात आली.