‘ऑफलाईन’ पीक पाहणीसाठी
बुधवारपर्यंत अर्ज सादर करा

महसूल, वनविभागातर्फे आवाहन

सकाळ वृत्तसेवा
सावंतवाडी, ता. २० ः ​खरीप हंगाम २०२५ मध्ये ज्या शेतकऱ्यांची तांत्रिक कारणास्तव किंवा अन्य काही कारणांमुळे ‘ई-पीक पाहणी’ ॲपवर नोंदणी होऊ शकली नाही, अशा शेतकऱ्यांसाठी राज्याने मोठा दिलासा दिला आहे. महसूल व वन विभागाने अशा पिकांची ‘ऑफलाईन’ पद्धतीने पाहणी करून नोंद घेण्याचे आदेश १४ डिसेंबरला निर्गमित केले आहेत. ​ज्या शेतकऱ्यांची नोंदणी राहिली आहे, त्यांनी संबंधित ‘ग्राम महसूल अधिकारी’ (तलाठी) यांच्याकडे १७ ते २४ डिसेंबरपर्यंत अर्ज सादर करावा, असे आवाहन केले आहे.
याबाबत दिलेल्या प्रसिद्धी पत्रकात म्हटले आहे, की २५ डिसेंबर ते ७ जानेवारीदरम्यान समिती प्रत्यक्ष शेतात येऊन पाहणी करेल. ​ऑफलाईन पाहणीसाठी एक विशेष समिती स्थापन केली आहे. या समितीत मंडल अधिकारी (अध्यक्ष), ग्राम महसूल अधिकारी/तलाठी (सदस्य), ग्राम विकास अधिकारी (सदस्य), सहायक कृषी अधिकारी (सदस्य) आदींचा समावेश आहे. ​शेतकऱ्याने अर्ज केल्यानंतर त्याला पोचपावती दिली जाईल. समिती प्रत्यक्ष शेतावर येण्यापूर्वी शेतकरी आणि शेजारच्या किमान ४-५ शेतकऱ्यांना लेखी स्वरुपात वेळ व दिनांक कळवेल. प्रत्यक्ष पाहणीच्या दिवशी स्थानिक चौकशी करून वस्तुस्थिती दर्शक ‘पंचनामा’ केला जाईल. आजूबाजूच्या शेतकऱ्यांचे जाबजबाब नोंदवून पिकाची अधिकृत नोंद केली जाईल. ज्यांची ई-पीक पाहणी अद्याप झाली नाही, त्यांनी २४ डिसेंबरपूर्वी आपले अर्ज तलाठी कार्यालयात सादर करावेत, जेणेकरून भविष्यात पीक विमा किंवा इतर शासकीय लाभांपासून त्यांना वंचित राहावे लागणार नाही, असे आवाहन प्रशासनाने केले आहे.