12006

जिद्द, प्रयत्नांच्या बळावर यश निश्चित

प्रा. जगन्नाथ हरयाण : खारेपाटण महाविद्यालयात मार्गदर्शन

सकाळ वृत्तसेवा
तळेरे, ता. २० : विद्यार्थ्यांनी जिद्द, चिकाटीच्या जोरावर आपले ध्येय निश्चित केल्यास यश हमखास मिळते, असे प्रतिपादन
खारेपाटण ज्युनिअर कॉलेजचे माजी विद्यार्थी व प्रकाश आयुर्वेद मेडिकल कॉलेज, ग्रेटर नोएडा, दिल्ली एनसीआरचे प्राचार्य डॉ. जगन्नाथ हरयाण यांनी केले.
प्रा. हरयाण यांनी खारेपाटण ज्युनिअर कॉलेजला सदिच्छा भेट दिली. यावेळी स्पर्धा परीक्षा व त्यानुषंगाने निर्माण होणाऱ्या करिअर संधी याविषयी विद्यार्थ्यांसाठी आयोजित मार्गदर्शन कार्यशाळेत हरयाण बोलत होते. डॉ. हरयाण हे खारेपाटण ज्युनिअर कॉलेजचे २००१-०२ या वर्षातील बारावी सायन्स बॅचचे माजी विद्यार्थी आहेत. ग्रामीण भागाची पार्श्वभूमी असणारे डॉ. हरयाण यांनी प्रयत्न व चिकाटीच्या बळावर मेडिकल कॉलेजच्या प्राचार्य पदापर्यंत झेप घेतली आहे. त्यांच्यासारखे असामान्य व्यक्तिमत्त्‍व खारेपाटण पंचक्रोशीतील विद्यार्थ्यांसाठी एक आदर्श असेल, असे मत प्रशालेचे प्राचार्य संजय सानप यांनी आपल्या मनोगतात व्यक्त केले.
डॉ. हरयाण यांनी भविष्यातील करिअरच्या विविध संधी, त्यासाठी आवश्यक असणारी शैक्षणिक पात्रता अशा विविध विषयांवर विद्यार्थ्यांसोबत संवाद साधला. तसेच प्रशालेसाठी सात हजार रुपये देणगी दिली. प्रशालेतर्फे खारेपाटण पंचक्रोशी शिक्षण प्रसारक मंडळाचे अध्यक्ष प्रवीण लोकरे, उपाध्यक्ष भाऊ राणे, माजी विद्यार्थी अमोल तळगावकर, प्रा. सानप, पर्यवेक्षक संतोष राऊत यांनी पुष्पगुच्छ देऊन स्वागत केले. यावेळी डॉ. हरयाण यांचे बंधू व खारेपाटण हायस्कूलचे सहायक शिक्षक लक्ष्मीकांत हरयाण, ज्युनिअर कॉलेजचे प्राध्यापक उपस्थित होते. श्रीमती पाताडे यांनी सूत्रसंचालन केले. शिक्षिका महिंद्रे यांनी आभार मानले.