कणकवलीत नगराध्यक्ष कुणाचा?

नगरपंचायत निवडणूक; आजच्या मतमोजणीकडे सर्वांचे लक्ष

कणकवली, ता. २० : कणकवली नगरपंचायतीचे लोकप्रतिनिधी उद्या (ता.२१) निश्‍चित होणार आहे. येथील तहसील कार्यालयातील मतमोजणी कक्षात सकाळी दहा पासून मतमोजणी सुरू होईल. अर्ध्या तासात सर्व १७ प्रभागातील उमेदवार आणि नगराध्यक्ष कोण होणार याचा निकाल जाहीर होणार आहे.
‘कणकवली नगरपंचायत नगराध्यक्ष निवडणूक आम्‍ही जिंकणार’, असा दावा भाजप आणि शहर विकास आघाडीकडून केला जात आहे. त्‍याअनुषंगाने या दोन्ही पक्षांकडून विजयी मिरवणूक काढण्यासाठी आज तहसीलदारांकडून परवानगी अर्ज करण्यात आले. दरम्‍यान, निकालानंतर कोणताही अनुचित प्रकार घडू नये यासाठी भाजप कार्यकर्त्यांची व्यवस्था पाकळे हॉस्पिटल लगतच्या मैदानात केली आहे. तर शहर विकास आघाडीसाठी प्रांत कार्यालयासमोरील जागा निश्‍चित करण्यात आली आहे.
सन २०१८ मध्ये समीर नलावडे आणि संदेश पारकर यांच्यात नगराध्यक्षपदासाठी थेट लढत झाली होती. यात पारकर हे अवघ्या ३७ मतांनी पराभूत झाले होते. आताच्या निवडणुकीतही पारकर आणि नलावडे यांच्यात थेट मुकाबला आहे. यात शहर विकास आघाडी आणि भाजपकडून आपलाच उमेदवार नगराध्यक्षपदी विराजमान होणार असा दावा केला आहे. एवढेच नव्हे तर निकालानंतर विजयी मिरवणूक आणि त्‍यात डी.जे. वाजविण्याची परवानगी मिळावी यासाठी आज दोन्ही पक्षांकडून तहसील कार्यालयात परवानगीसाठी अर्ज दाखल करण्यात आले आहेत.
कणकवली नगरपंचायत निवडणुकीत नगराध्यक्षपदाची निवडणूक अटीतटीची होईल. तर १७ नगरसेवकांमधून भाजपचे उमेदवार बहुमताने निवडून येतील तर शहर विकास आघाडीचेही पाच ते सहा नगरसेवक निवडून येतील असा अंदाज बांधण्यात आला आहे. दरम्‍यान, कणकवली नगरपंचायत निकालाच्या पार्श्वभूमीवर कणकवलीत पोलिस बंदोबस्त सज्‍ज ठेवण्यात आला आहे.
----------------
सतराही प्रभागांमध्ये थेट लढत
कणकवली नगरपंचायतीमधील १७ प्रभाग आणि थेट नगराध्यक्षपदासाठी २ डिसेंबरला मतदान झाले होते. नगराध्यक्षपदासाठी शहर विकास आघाडीचे संदेश पारकर आणि भाजपकडून समीर नलावडे लढत देत आहेत. तर १७ प्रभांगामध्येही शहर विकास आघाडी आणि भाजप यांच्यात थेट लढत आहे. मात्र, पालकमंत्री नीतेश राणे यांच्या नेतृत्‍वाखालील भाजप आणि कुडाळ-मालवणचे आमदार नीलेश राणे यांच्या नेतृत्‍वाखालील शहर विकास आघाडी असा मुकाबला आहे.