12919

वार्षिक नियोजनातील कामे आचारसंहितेपूर्वी पूर्ण करा

जिल्हाधिकारी ः सिंधुदुर्गनगरीत योजनांचा आढावा

सकाळ वृत्तसेवा
सिंधुदुर्गनगरी, ता. २३ ः जिल्ह्याच्या सर्वांगीण विकासासाठी राबविण्यात येत असलेल्या जिल्हा वार्षिक योजनेचा सविस्तर आढावा जिल्हाधिकारी तृप्ती धोडमिसे यांनी आज घेत कामे जलद गतीने पूर्ण करण्याच्या सूचना दिल्या.
जिल्हाधिकाऱ्यांच्या अध्यक्षतेखाली आयोजित या बैठकीत राज्यस्तरीय योजना तसेच स्थानिक स्वराज्य संस्थांमार्फत राबविण्यात येणाऱ्या योजनांच्या अंमलबजावणीचा सखोल आढावा घेतला. यावेळी जिल्हा नियोजन अधिकारी यशवंत बुधावले तसेच विविध यंत्रणेचे अधिकारी उपस्थित होते.
या बैठकीत जिल्हा वार्षिक योजना (सर्वसाधारण) अंतर्गत २०२४-२५ व २०२५-२६ या कालावधीतील योजनानिहाय व कामनिहाय स्थिती तपासण्यात आली. जिल्हा नियोजन समितीकडून मंजूर कामांच्या निविदा प्रक्रिया, कार्यारंभ आदेश तसेच प्रत्यक्ष कामांची सद्यस्थिती याबाबत संबंधित यंत्रणांकडून अहवाल मागविले होते. निविदा प्रक्रिया पूर्ण होऊन कार्यारंभ आदेश दिलेली कामे पूर्ण करण्याच्या सूचना जिल्हाधिकाऱ्यांनी दिल्या. ज्या कामांची निविदा प्रक्रिया अद्याप पूर्ण झाली नाही, ती तत्काळ पूर्ण करून कार्यारंभ आदेश देण्याचे निर्देश यंत्रणांना दिले.
२०२४-२५ अंतर्गत दायित्व निधीची मागणी सादर करण्याचे आदेश देताना, आगामी काळातील जिल्हा परिषद आचारसंहिता लक्षात घेऊन प्रशासकीय मान्यता वेळेत पूर्ण होतील, निधी अखर्चित अथवा समर्पित राहणार नाही, याची विशेष दक्षता घेण्याच्या सूचना जिल्हाधिकाऱ्यांनी दिल्या. याशिवाय, जिल्ह्यातील सर्व पायाभूत सुविधांसाठी युनिक आयडी तयार करण्याचे शासनाचे निर्देश असून, त्यानुसार एमएचयूआयडी पोर्टलवर युनिक आयडी निर्मितीचा आढावा या बैठकीत घेण्यात आला. जिल्ह्यातील सर्व पायाभूत सुविधांचे युनिक आयडी ३१ डिसेंबरपर्यंत तयार करण्याचे निर्देश जिल्हाधिकाऱ्यांनी संबंधित यंत्रणांना दिले.