गणपतीपुळे येथे आज
सरस प्रदर्शनाचे उद्‍घाटन
रत्नागिरी, ता. २३ : ग्रामविकास व पंचायतराज विभाग, महाराष्ट्र राज्य ग्रामीण जीवनोन्नती अभियानाची अंमलबजावणी जिल्हा अभियान व्यवस्थापन कक्ष, जिल्हा ग्रामीण विकास यंत्रणा यांच्यावतीने २४ ते २८ डिसेंबर या कालावधीमध्ये श्री क्षेत्र गणपतीपुळे येथे जिल्हास्तरीय सरस प्रदर्शन व विक्री आयोजित केले आहे. प्रदर्शनाचे उद्‍घाटन सकाळी ११ वाजता उद्योगमंत्री उदय सामंत व गृहराज्यमंत्री योगेश कदम यांच्या हस्ते होणार आहे. प्रदर्शनाचा लाभ नागरिकांनी मोठ्या संख्येने घ्यावा, असे आवाहन मुख्य कार्यकारी अधिकारी वैदेही रानडे यांनी केले आहे.
जिल्हा परिषदेत आयोजित पत्रकार परिषदेत त्या बोलत होत्या. त्या म्हणाल्या, जिल्हास्तरीय विक्री व प्रदर्शन हे ग्रामीण भागातील स्वयंसहाय्यता समूहातील महिलांनी उत्पादित केलेल्या विविध उत्पादित मालांच्या विक्रीसाठी हक्काचे व्यासपीठ मानले जाते. या प्रदर्शनामध्ये जिल्ह्यातील एकूण ७५ बचतगट सहभागी होणार आहेत. यामध्ये ६० उत्पादनाचे स्टॉल व १५ फूडस्टॉल आहेत. १०७ स्वयंसहाय्यता समूह, चार महिला शेतकरी व उत्पादक कंपन्या व १ उद्योग विकास केंद्र यातील महिला सहभागी होणार आहेत.
नाताळच्या सुटीमध्ये प्रदर्शन असल्याने मालाची विक्री मोठ्या प्रमाणात होण्यास मदत होईल. प्रदर्शनकाळात संध्याकाळी स्वयंसहाय्यता समूहातील सदस्य यांचे मनोरंजनपर सांस्कृतिक कार्यक्रम तसेच लोककला, लोकगीत, भारुडे, वैयक्तिक व सामूहिक कार्यक्रम, सहभागी स्टॉल प्रतिनिधींकरिता फनी गेम आयोजित करण्यात येणार आहेत. कार्यक्रमाचा सांगता समारंभ २८ डिसेंबरला दुपारी ३ वाजता होणार आहे.