दुचाकी अपघातातील
जखमी तरुणाचा मृत्यू
रत्नागिरी ः शहरातील अभियांत्रिकी महाविद्यालयाच्या मागील रस्त्यावरून विश्वनगर येथे जाणाऱ्या तरुणाचा ७ ऑक्टोबरला अपघात झाला होता. अपघातामध्ये त्याच्या डोक्याला गंभीर दुखापत झाली होती. कोल्हापूर येथे उपचार करून त्याला घरी आणण्यात आले होते. मात्र, तब्येत बिघडल्याने त्याला जिल्हा शासकीय रुग्णालयात दाखल केले होते. उपचारादरम्यान त्याचा मृत्यू झाला. रत्नदीप रणजित खेतले (वय २४, रा. निवखोल, रत्नागिरी) असे मृत तरुणाचे नाव आहे. खेतले हा मित्र रूद्र थुळ (१८, रा. निवखोल-रत्नागिरी) याच्या सोबत दुचाकीवरून जात असताना अभियांत्रिकी महाविद्यालयाच्या मागील रस्त्यावर त्याची दुचाकी विजेच्या खांबाला धडकली होती. अपघातात रत्नदीपच्या डोक्याला गंभीर दुखापत झाली, तर रूद्र किरकोळ जखमी झाला होता.
----------------
मांडवी येथील
वृद्धाचा आकस्मिक मृत्यू
रत्नागिरी ः शहरातील मांडवी येथील वृद्धाला चक्कर आल्याने उपचारासाठी जिल्हा शासकीय रुग्णालयात दाखल केले होते. तेथील वैद्यकीय अधिकाऱ्यांनी त्यांना तपासून मृत घोषित केले. विष्णू सीताराम वालकर (वय ७५, मूळ रा. भडे, ता. लांजा, सध्या पद्मावती वाटीक, मांडवी रत्नागिरी) असे मृत वृद्धाचे नाव आहे. ही घटना गुरुवारी (ता. २५) सकाळी साडेसात वाजता जिल्हा शासकीय रुग्णालयात घडली. पोलिसांकडून मिळालेल्या माहितीनुसार, वालकर यांनी सकाळी चहा प्यायल्यानंतर टॉयलेटला जात असताना अचानक त्यांना चक्कर आली. तत्काळ त्यांना उपचारासाठी जिल्हा शासकीय रुग्णालयात दाखल केले. तेथील वैद्यकीय अधिकाऱ्यांनी त्यांना तपासून मृत घोषित केले.