14169

रोहन पाटील यांचा
सावंतवाडीत सत्कार

सकाळ वृत्तसेवा
सावंतवाडी, ता. २९ ः सामाजिक भान ठेवून विधायक काम करणाऱ्या शैक्षणिक, सामाजिक, सांस्कृतिक, कला, क्रीडा, संगीत, सहकार क्षेत्रात उल्लेखनीय काम करणाऱ्या (कै.) बाबुराव पाटयेकर माध्यमिक विद्यालय, दाणोली प्रशाळेचे सहायक शिक्षक रोहन पाटील यांना सिंधुदुर्ग जिल्ह्याचा मानाचा ज्ञानदीप पुरस्कार देऊन सन्मानित केले गेले.
श्री. पाटील हे गेली १८ वर्षे अध्यापनाचे कार्य करत आहेत. ते मूळचे शिवणगे (ता. चंदगड) येथील रहिवाशी असून दाणोळी शाळेत शिक्षक म्हणून कार्यरत आहेत. मुलांना गणित तसेच सांस्कृतिक शिक्षणामध्ये लेझीम, गोफ नृत्य, साडी ड्रिल, मानवी मनोरे, मर्दानी खेळ शिकवतात. येथील श्रीराम वाचन मंदिरात आयोजित सोहळ्यास ‘ज्ञानदीप’चे संस्थापक अध्यक्ष वाय. पी. नाईक, कार्याध्यक्ष नीलेश पारकर, खजिनदार एस. आर. मांगले, उपाध्यक्ष एस. जी. साळगावकर, कवी विठ्ठल कदम, आर्वी नारकर, एकनाथ घोंगडे, सुनील नेवगी, दीपक गावकर, सुनील कदम, पांडुरंग काकतकर आदींसह मंडळाचे सदस्य उपस्थित होते. शिक्षण प्रसारक मंडळाचे अध्यक्ष विक्रांत सावंत, ज्येष्ठ पत्रकार गजानन नाईक, सीए लक्ष्मण नाईक, अभिमन्यू लोंढे, सागर चव्हाण, जावेद शेख यांच्या प्रमुख उपस्थितीत हा पुरस्कार प्रदान करण्यात आला. भरत गावडे यांनी सूत्रसंचालन केले. सहसचिव विनायक गवस यांनी आभार मानले.