सावंतवाडी रुग्णालयात
आज आरोग्य शिबिर

सावंतवाडी, ता. १० ः सामाजिक बांधिलकी प्रतिष्ठान आणि कोकण कला व शिक्षण विकास संस्थेच्या संयुक्त विद्यमाने येथील उपजिल्हा रुग्णालयात उद्या (ता. २०) सकाळी १० ते सायंकाळी ४ वाजेपर्यंत मोफत आरोग्य तपासणी व शस्त्रक्रिया नोंदणी शिबिराचे आयोजन केले आहे.
शिबिराच्या उद्‍घाटन कार्यक्रमाला ‘सामाजिक बांधिलकी’चे अध्यक्ष प्रा. सतीश बागवे, कोकण संस्थेचे अध्यक्ष दयानंद कुबल यांची प्रमुख उपस्थिती लाभणार आहे. या शिबिरासाठी भ. क. ल. वालावलकर रुग्णालय व वैद्यकीय महाविद्यालय, डेरवण यांचे सहकार्य लाभले आहे. या शिबिरात अनुभवी व तज्ज्ञ डॉक्टरांचे पथक उपलब्ध असणार असून हृदयविकार (अँजिओप्लास्टी, बायपास), युरोलॉजी (मूत्रपिंड व प्रोस्टेट विकार), अस्थिरोग (अपघात व सांधेदुखी), कॅन्सर शस्त्रक्रिया, डोळ्यांचे विकार (मोतिबिंदू व कॉर्निया), स्त्रीरोग, कान-नाक-घसा तसेच जनरल सर्जरी अशा विविध विभागांतील आजारांची तपासणी करण्यात येणार आहे. आवश्यक रुग्णांची शस्त्रक्रियेसाठी नोंदणी या शिबिरातच केली जाणार आहे. आर्थिकदृष्ट्या दुर्बल घटकांतील रुग्णांसाठी उपचार मोफत असून त्यासाठी पिवळे किंवा केसरी रेशनकार्ड तसेच आधारकार्ड सोबत आणणे आवश्यक आहे. शिबिरस्थळी रुग्णांसाठी नाश्ता, चहा व पिण्याच्या पाण्याची व्यवस्था केली आहे. या शिबिराचा लाभ घ्यावा, असे आवाहन रवी जाधव यांनी केले आहे.