swt2727.jpg

साक्षी वंजारी

सावंतवाडी पालिकेचा पाणीप्रश्नाकडे दुर्लक्ष
साक्षी वंजारी ः तातडीने उपाययोजना न केल्यास तीव्र आंदोलन
सकाळ वृत्तसेवा
सावंतवाडी, ता. २७ ः शहरात काही भागात पाण्याचा प्रश्न गंभीर बनला आहे. उभाबाजार परिसरात गेल्या तीन दिवसांपासून पाणीच आले नसून सत्ताधाऱ्यांसह प्रशासनाचे पूर्णतः याकडे दुर्लक्ष आहे. टँकरची मागणी करूनही प्रशासनाकडून समाधानकारक उत्तर मिळत नाही, अशी टीका काँग्रेस जिल्हाध्यक्ष साक्षी वंजारी यांनी केली. सत्ताधाऱ्यांनी येत्या तीन महिन्यांत शहरातील विविध प्रश्न मार्गी लावून नागरिकांना अपेक्षित असे काम करावे; अन्यथा नागरिकांच्या प्रश्नासाठी प्रसंगी आंदोलनात्मक भूमिका हाती घेऊ, असा इशाराही त्यांनी यावेळी दिला.
सौ. वंजारी यांनी आज येथे पत्रकार परिषद घेत पालिका प्रशासन आणि सत्ताधारी नगराध्यक्ष, उपनगराध्यक्षांसह नगरसेवकांवर टीका केली. त्या म्हणाल्या, ‘‘सावंतवाडी शहरातील काही भागात पाण्याचा प्रश्न गंभीर बनला आहे. बाजार परिसरामध्ये दैनंदिन वापरासाठी सुद्धा पाणी मिळत नाही. या प्रश्नाकडे तेथील नगरसेवकांचे दुर्लक्ष झाले आहे. प्रशासनाला फोन केला असता समाधानकारक उत्तर मिळत नाही. मुख्याधिकारी तर फोनच उचलत नाही. त्यामुळे नागरिकांनी दाद मागावी कोणाकडे, असा प्रश्न उपस्थित झाला आहे.​ पाण्यासोबतच प्रभागातील स्वच्छतेचा प्रश्नही ऐरणीवर आला असून इतर प्रभागांमध्ये नियमित साफसफाई होत असताना उभाबाजार परिसरात मात्र स्वच्छता मोहीम राबवली जात नाही. ठिकठिकाणी रस्ताकामे सुरू आहेत; परंतु या कामांकडे सुद्धा सत्ताधारी आणि प्रशासनाचे दुर्लक्ष आहे. याचा त्रास नागरिकांना सहन करावा लागत आहे. पाणी प्रश्नावर टँकरसारखी उपयोजना असताना त्याचाही विचार केला जात नाही. त्यासाठी फोन केला असता समर्पक उत्तरे मिळत नाहीत. या सर्व विषयांवर सत्ताधाऱ्यांनी तीन महिन्यांत तोडगा काढावा; अन्यथा आंदोलनात्मक पवित्र घेऊ.’’
​