मुंबई : उद्धव ठाकरे यांची महाड इथं जाहीर सभा पार पडली. यावेळी त्यांनी केंद्रीय मंत्री नारायण राणे यांच्यावर सडकून टीका केली. भाजपनं सुक्ष्म माणसावर मोठी जबाबदारी सोपवली आहे, अशा शब्दांत उद्धव ठाकरेंनी राणेंवर शेलक्या शब्दांत टीका केली. (Uddhav Thackeray Mahad Rally Big responsibility entrusted to small man criticism on Narayan Rane)

उद्धव ठाकरे म्हणाले, आपल्याकडं एक आणि एकावर दोन फ्री असे काहीजण आहेत. त्याची आता एवढी पंचायत झाली की त्यांना काय सांभाळावं हे कळत नाहीए. त्यामुळं सुक्ष्म माणसावर मोठी जबाबदारी आली आहे. पण हे रोज वाट्टेल ते बोलतात, बोलू द्या कारण याच्यावर त्यांचं पोट चालतंय. उद्धव ठाकरेंचं तुम्ही सध्या सर्वकाही काढून घेतलं तरी तुम्हाला त्याची का भीती वाटते?

उद्धव ठाकरेला संपवायचं आहे ना, संपवा. पण हे सर्वजण माझे कुटुंबीय आहेत. बारसूमध्ये उद्धव ठाकरेंच्या नातेवाईकांच्या जमिनी आहेत असं राणे सांगत आहेत. पण इथं बसलेले सर्वजण माझे नातेवाईक आहेत. मी माझ्या या नातेवाईकांसाठी लढतो आहे, पण तुम्ही उपऱ्यांसाठी लढता आहात. ज्याचं काहीही देणंघेणं नाही. तुम्ही माझा महाराष्ट्र मारता आहात, अशा शब्दांत उद्धव ठाकरेंनी नारायण राणेंवर हल्लाबोल केला.

आम्ही शिवसेना सोडतोय कारण उद्धव ठाकरेंनी हिंदुत्व सोडलं आहे. हिंदुत्व काय आहे ते तुम्ही समजून घ्या. जे मला शिवसेनाप्रमुख आणि प्रबोधनकारांनी हिंदुत्व सांगितलं आहे. आमचं हिंदुत्व हे शेंडी-जाणव्याचं हिंदुत्व नाही. अनेकदा मला साहेबांनी सांगितलं की मला देवळात घंटा बडणारा नको तर अतिरेक्यांना बडवणारा हिंदु पाहिजे. भाजपकडं कुठलं हिंदुत्व आहे, गोमुत्रधारी हिंदुत्व आहे त्यांचं मी हे नवं नामकरण केलं आहे.