सावंतवाडी : शहरात दिवाळीच्या तोंडावर रस्ते खोदाई करण्याचे सुरु असलेले काम जलद गतीने दोन दिवसात पूर्ण करा, असे जिओ कंपनीच्या वरिष्ठांना सांगितले असून याबाबत मी संबंधितांशी चर्चा केल्याचे आमदार दिपक केसरकर यांनी पत्रकारांशी बोलताना सांगितले. आमदार केसरकर यांच्या कार्यालयांमध्ये आज शिवसेना नगरसेवकांची बैठक झाली. यावेळी तालुकाप्रमुख रूपेश राऊळ, शहर प्रमुख नगरसेवक खेमराज उर्फ बाबू कुडतरकर, शिवसेनेच्या नगरपरिषद गटनेत्या अनारोजीन लोबो, नगरसेवक सुरेंद्र बांदेकर, भारती मोरे, माधुरी वाडकर आदी उपस्थित होते.

यावेळी आमदार केसरकर म्हणाले, 'सावंतवाडी शहरामध्ये सुरू असणारी रस्ते खोदाई ही ऐन दिवाळीच्या तोंडावर असल्याने व्यापाऱ्यांमध्ये नाराजी आहे. दिवाळी सणाच्या काळात रस्ता खोदाई सुरू असल्यामुळे व्यापार उदीमाला अडथळा येईल अशी भीती आहे. यामुळे जिओ कंपनीच्या वरिष्ठांशी चर्चा केली आहे. ज्यादा कामगार लावा आणि जी खोदाई सुरू केली आहे, ती येत्या दोन दिवसांत पूर्ण करून व्यापारी व ग्राहकांना अडथळा निर्माण होणार नाही याची खबरदारी घ्या. बाजारपेठेतील रस्ता जिओ कंपनीने केबल टाकून जलद गतीने पूर्ववत करून घेतील असेही ते म्हणाले आहेत.