विम्बल्डन स्पर्धेतील गत विजेती सिमोना हालेप हिने आगामी विम्बल्डन स्पर्धेतून माघार घेतली आहे. डाव्या पायाच्या पिंडरीला दुखापत झाल्यामुळे तिला स्पर्धेतून माघार घ्यावी लागलीये. रोमानियाची 29 वर्षीय हालेप महिलांच्या जागतिक टेनिस क्रमवारीत तिसऱ्या स्थानावर आहे. यापूर्वीच जपानची नाओमी ओसाका हिने स्पर्धेतून माघार घेतल्यामुळे सिमोन हालेपला स्पर्धेत दुसरे मानांकन मिळाले होते.

ऑस्ट्रेलियन अ‍ॅश्ले बार्टी आघाडीच्या मानांकनासह खेळताना दिसणार आहे. सिमोन हालेप हिला इटालियन ओपन स्पर्धेत दुखापत झाली होती. शुक्रवारी तिने स्पर्धेतून माघार घेण्याचा निर्णय घेतला. सिमोनने 2019 च्या विम्बल्डनशिवाय 2018 मध्ये फ्रेंच ओपन स्पर्धा जिंकली होती. ही दोन दोन ग्रँडस्लॅम तिच्या नावे आहेत.

कोरोनाच्या संकटामुळे 2020 मध्ये विम्बल्डन स्पर्धा होऊ शकली नव्हती. 2019 मध्ये झालेल्या विम्बल्डन स्पर्धेत सिमोन हालेपने अमेरिकन स्टार महिला टेनिसपटू सेरेना विल्यम्सला 6-2, 6-2 अशा फरकाने सरळ सेटमध्ये पराभवाचा दणका दिला होता. सोमवारपासून विम्बल्डन स्पर्धेला सुरुवात होणार आहे. या स्पर्धेच्या ड्रॉपूर्वीच सिमोन हालेपने स्पर्धेत खेळणार नसल्याचे स्पष्ट केले आहे.