Bangladesh Defeat Afghanistan 3rd Match Group B : बांगलादेशने ठवलेले 128 धावांचे आव्हान पार करताना अफगाणिस्तानची देखील दमछाक झाली. मात्र अखेर अफगाणिस्तानने हे आव्हान 3 गड्यांच्या मोबदल्यात पार करत आपले ग्रुपमधील दोन्ही सामने जिंकून अव्वल स्थान पटकावले. नजीबुल्ला झादरान आणि इब्राहीम झादरान यांनी चौथ्या विकेटसाठी 69 धावांची दमदार भागीदारी रचली. नजीबुल्लाने 17 चेंडूत नाबाद 43 धावांचा तुफानी खेळी केली. तर इब्राहीमने चिवट फलंदाजी कर 41 चेंडूत 42 धावा केल्या. (Najibullah Zadran Ibrahim Zadran Shine)

अफगाणिस्तानचे फलंदाज परिस्थिती कोणतीही असो आक्रमक खेळण्यावर भर देतात. मात्र आजच्या सामन्यात अफगाणिस्तानचे सलामीवीर हजरतुल्ला झजाई आणि रेहमतुल्ला गुरबाज यांनी पॉवर प्लेमध्ये सावध पवित्रा घेत फलंदाजी केली. मात्र ही सावध सुरूवात बांगलादेशचा कर्णधार शाकिब अल हसनने पाचव्या षटकात 15 धावांवर संपवली. त्याने 18 चेंडूत 11 धावा करणाऱ्या रेहमतुल्ला गुरबाजला बाद केले.

यानंतर अफगाणिस्तानचा कर्णधार मोहम्मद नबी आणि सलामीवीर हजरतुल्ला झजाई यांनी संघाला 10 षटकात 45 धावांपर्यंत पोहचवले. मात्र ही भागीदारी मोसादेक हुसैनने तोडली. त्याने 23 धावा करणाऱ्या हजरतुल्लाला बाद केले. यानंतर कर्णधार नबी देखील 8 धावांची भर घालून माघारी परतला.

यानंतर इब्राहीम झरदान आणि नजीबुल्ला झादरान यांनी दमदार फलंदाजी करत चौथ्या विकेटसाठी 66 धावांची नाबाद भागीदारी रचली. इब्राहीमने 41 चेंडूत 42 धावा केल्या तर नजीबुल्लाने 17 चेंडूत नाबाद 43 धावांची तुफानी खेळी करत अफगाणिस्तानला 19 व्या षटकात विजय मिळवून दिला.

आशिया कप ग्रुप B मधील बांगलादेश आणि अफगाणिस्तान यांच्यातील सामन्यात बांगलादेशने नाणेफेक जिंकून प्रथम फलंदाजी करण्याचा निर्णय घेतला. शारजावर होत असलेल्या या सामन्यात प्रथम फलंदाजी करणाऱ्या बांगलादेशला अफगाणी फिरकीपटूंनी चांगलेच रडवले. मुजीब उर रेहमान आणि राशिद खान यांच्या फिरकीसमोर बांगलादेशला 20 षटकात 7 बाद 127 धावांपर्यंतच मजल मारता आली. बांगलादेशकडून मोसादेक हुसैनने 48 धावांची झुंजार खेळी केली.