Ajinkya Rahane : बीसीसीआयने आज दक्षिण अफ्रिकेच्या दौऱ्यासाठी भारताच्या वनडे, टी 20 आणि कसोटी संघाची घोषणा केली. कसोटी संघात बीसीसीआयने नव्या जुन्यांचा सरमिसळ केली आहे. मात्र यावेळी तरूण खेळाडूंना झुकतं माप देत आपण आता भविष्याकडे पाहत असल्याचे निवडसमितीने संकेत दिले.

भारताचे दोन दिग्गज कसोटी खेळाडू अजिंक्य रहाणे आणि चेतेश्वर पुजारा यांना दक्षिण अफ्रिकेविरूद्धच्या कसोटी मालिकेसाठी संघात स्थान देण्यात आलेले नाही. उलट यशस्वी जैसवाल, ऋतुराज गायकवाड आणि श्रेयस अय्यरवर निवडसमितीने विश्वास दर्शवला आहे.

यामुळे आधीच वनडे आणि टी 20 मधून इतिहास जमा झालेले अजिंक्य रहाणे आणि चेतेश्वर पुजारा आता कसोटीत देखील साईडलाईन झाले आहेत का अशी चर्चा सुरू झाली आहे.

भारतीय कसोटी संघात रोहित शर्मा, शुभमन गिल, यशस्वी जैसवाल आणि ऋतुराज गायकवाड अशा चार सलामीवीरांची निवड करण्यात आली आहे. मात्र गेल्या काही कसोटी सामन्यांपासून शुभमन गिल हा तिसऱ्या क्रमांकावर फलंदाजी करतोय. त्याला संघ व्यवस्थापन चेतेश्वर पुजाराचा वारसदार म्हणून तयार करत आहे. त्यामुळे रोहित शर्मासोबत डावखुरा यशस्वी जैसवाल हा संघाची पहिली पसंती असणार आहे. तर ऋतुराज सध्या तरी बॅकअप म्हणूनच राहील.

दुसऱ्या बाजूला मधल्या फळीत श्रेयस अय्यरने वनडे वर्ल्डकपमध्ये आपला फॉर्म आणि क्लास दोन्ही सिद्ध करून दाखवलं आहे. त्यामुळे त्याचे कसोटीत पुनरागमन होणं निश्चितच होतं. मात्र त्याच्या संघातील पुनरागमनाने अजिंक्य रहाणेसाठी भारतीय कसोटी संघाचे दार कायमचे बंद होण्याची शक्यता आहे.

दक्षिण अफ्रिका दौऱ्यावर जाणारा भारतीय कसोटी संघ :

रोहित शर्मा (कर्णधार), शुभमन गिल, यशस्वी जैसवाल, विराट कोहली, श्रेयस अय्यर, ऋतुराज गायकवाड, इशान किशन, केएल राहुल, आर. अश्विन, रविंद्र जडेजा, शार्दुल ठाकूर, मोहम्मद सिराज, मुकेश कुमार, मोहम्मद शमी (फिट असेल तर), जसप्रीत बुमराह, प्रसिद्ध कृष्णा.

(Sports Latest News)