Jay Shah ACC President : भारतीय क्रिकेट नियामक मंडळ अर्थात BCCI चे सचिव जय शाह यांची सलग तिसऱ्यांदा आशियाई क्रिकेट परिषद म्हणजेच ACC चे अध्यक्षपदी निवड झाली आहे. आशियाई क्रिकेट परिषदेचा बॉस म्हणून ही त्यांची तिसरी टर्म असेल. याची अधिकृत घोषणा करण्यात आली आहे. इंडोनेशियातील बाली येथे आशिया कप 2025 संदर्भात बैठक सुरू आहे.

एएनआयनी या वृत्तसंस्थेने याला दुजोरा दिला आहे. आशिया कपचा पुढील हंगाम आता 2025 मध्ये होणार आहे. ही स्पर्धा टी-20 फॉरमॅटमध्ये खेळली जाईल. यापूर्वीची स्पर्धा एकदिवसीय स्वरूपात खेळली गेली होती.

जय शाह यांचा दुसरा कार्यकाळ अजून संपलेला नाही आणि तिसऱ्यांदाही त्यांची अध्यक्षपदी निवड झाली आहे. पण नोव्हेंबरमध्ये आयसीसीच्या निवडणुका होणार आहे. तेव्हा जय शाह निवडणूक लढू शकतात, अशी शकता आहे.

एकप्रकारे त्यांना आशिया खंडाचा पाठिंबा मिळाला आहे. जय शाह सध्या बीसीसीआयचे सचिव आहेत, जे मोठे पद आहे. जर ते आयसीसीचे अध्यक्ष झाले तर हा भारताचा मोठा विजय असेल.

जय शाह यांनी 30 जानेवारी 2021 रोजी ACC चे अध्यक्षपद स्वीकारले होते. त्यांच्या आधी पाकिस्तानचे नजमुल हसन आशियाई क्रिकेट परिषदेचे अध्यक्ष होते. जय शाह ऑक्टोबर 2019 पासून बीसीसीआयच्या सचिवपदी कार्यरत आहेत. त्यावेळी सौरव गांगुली बीसीसीआयचे अध्यक्ष बनले होते, आता रॉजर बिन्नी या पदावर आहेत. परंतु जय शाह यांचा सचिवपदाचा कार्यकाळ कायम आहे.