Australia Vs England T20I Matthew Wade : इंग्लंड सध्या ऑस्ट्रेलिया दौऱ्यावर आहे. या दौऱ्यात इंग्लंड आणि ऑस्ट्रेलिया यांच्यात तीन टी 20 सामन्यांची मालिका खेळली जात आहे. दरम्यान, पहिल्या सामन्यात इंग्लंडने ऑस्ट्रेलियाचा 8 धावांनी पराभव केला. मात्र या सामन्यावेळी यजमान ऑस्ट्रेलियाच्या मॅथ्यू वेडने अखिलाडूवृत्तीचे दर्शन घडवले. यावरून आता ऑस्ट्रेलिया आणि मॅथ्यू वेडला चांगलेच ट्रोल केले जात आहे.

हे संपूर्ण प्रकरण दुसऱ्या डावातील 17 व्या षटकात घडले. इंग्लंडने ऑस्ट्रेलियासमोर 209 धावांचे आव्हान ठेवले होते. मात्र कांगारूंची सुरूवात फारशी चांगली झाली नाही. ऑस्ट्रेलियाकडून एकडा डेव्हिड वॉर्नर लढला. त्यानंतर मिचेल मार्श आणि मार्कस स्टॉयनिस यांनी सामन्यातील ऑस्ट्रेलियाचे आव्हान जिवंत ठेवले होते.

ऑस्ट्रेलियाला सेवटच्या 4 षटकात 40 धावांची गरज होती. 17 व्या षटकात डेव्हिड वॉर्नर स्ट्राईकवर होता. त्याने पहिल्या चेंडूवर एक धाव घेत स्ट्राईक मॅथ्यू वेडकडे दिले. मात्र पुढचा चेंडू वेडने निर्धाव घालवला. दरम्यान, वूडचा एका शॉर्ट बॉलवर वेड बावचळला. चेंडू त्याच्या बॅटला लागून वर उडाला. हा कॅच पकडण्यासाठी वूड बॅटिंग एन्डच्या क्रीजकडे धावत होता. मात्र त्याचवेळी मॅथ्यू वेडने हाताने त्याला आडवत धावबाद होण्यापासून वाचण्यासाठी डाईव्ह मारला. वूडची अडवणूक झाल्याने त्याला झेल घेता आला नाही. सध्या सोशल मीडियावर हा व्हिडिओ व्हायरल होत आहे.

याच षटकात डेव्हिड वॉर्नर बाद झाला. त्यानंतर ऑस्ट्रेलियाला शेवटच्या षटकात 16 धावांची गरज असताना वेड 15 चेंडूत 21 धावा करून बाद झाला. ऑस्ट्रेलिया 20 षटकात 9 बाद 200 धावाच करू शकली. इंग्लंडने सामना 8 धावांनी जिंकला. मार्क वूडने भेदक मारा करत 4 षटकात 34 धावा देत 3 विकेट घेतल्या.