ऑस्ट्रेलिया संघाचे मुख्य प्रशिक्षक जस्टीन लँगर (Justin Langer) यांनी आपल्या पदाचा राजीनामा देत सर्वांनाच धक्का दिला. विशेष म्हणजे त्यांच्या कार्यकाळात ऑस्ट्रेलियाने अ‍ॅशेस मालिकेत (Ashes Series) इंग्लंडचा 4-0 असा पराभव केला. याचबरोबर ऑस्ट्रेलियाने टी 20 वर्ल्डकप देखील जिंकला. जस्टीन लँगर आणि क्रिकेट ऑस्ट्रेलिया (Cricket Australia) यांच्यात त्यांचा करार वाढवून देण्याबाबत दीर्घ चर्चा सुरू होती. मात्र लँगर यांनी अचानक राजीनाम्याचा बॉम्ब टाकला. (Australia Men Cricket Team Coach Justin Langer Surprise Resignation)

स्पोर्ट्स मॅनेजमेंट कंपनी डीएसईजी (DSEG)DSEG यांनी जस्टीन लँगर यांच्या राजीनाम्याबाबत 'जस्टीन लँगर यांनी आज सकाळी ऑस्ट्रेलिया पुरूष क्रिकेट संघाच्या प्रशिक्षक पदाचा राजीनामा दिला आहे.' असे वक्तव्य प्रसिद्ध केले.

जस्टीन लँगरला क्रिकेट ऑस्ट्रेलियाने त्यांच्या पदासाठी पुन्हा अर्ज करण्यास सांगितले होते. तसेच त्यांना छोट्या कालावधीसाठी करारबद्ध करण्यात येणार होते. याचा लँगर यांना राग आल्याची चर्चा सुरू आहे. ऑस्ट्रेलियाने अ‍ॅशेस मालिका 4-0 अशी जिंकल्यानंतर ती जागतिक कसोटी क्रमवारीत अव्वल स्थानावर पोहचली आहे.

दरम्यान, क्रिकेट ऑस्ट्रेलियाने जस्टीन लँगर यांच्या राजीनाम्यावर आपली प्रतिक्रिया दिली. 'जस्टीन यांना त्यांच्या सध्याच्या करारात छोटी मुदतवाढ देण्याचा प्रस्ताव ठेवण्यात आला होता. मात्र त्यांना तो मान्य न करण्याचा निर्यण घेतला.' लँगर यांच्या राजीनाम्यानंतर क्रिकेट ऑस्ट्रेलियाने अँड्र्यु मॅकडोनाल्ड यांची हंगामी प्रशिक्षक म्हणून नियुक्ती केली आहे.