मेलबर्न, ऑस्ट्रेलियन ओपन टेनिस ‘ग्रँड स्लॅम’मध्ये बुधवारी मानांकित खेळाडूंनी अपेक्षेप्रमाणे कामगिरी करीत प्रतिस्पर्ध्यांवर विजय मिळवले. पुरुषांच्या एकेरीत राफेल नदाल, ॲलेक्झांडर झ्वरेव व महिला एकेरीत ॲश्‍ले बार्ती, नाओमी ओसाका यांनी प्रतिस्पर्धी टेनिसपटूंना हरवून तिसऱ्या फेरीत प्रवेश केला. (Australian Open 2022 Rafael Nadal Ashleigh Barty Match Result)

नदालने जर्मनीच्या यानिक हँफमॅनवर ६-२, ६-३, ६-४ अशा फरकाने दोन तास व ४२ मिनिटांमध्ये विजय मिळवला. तिसरा मानांकित झ्वरेवने ऑस्ट्रेलियाच्या जॉन मिलमॅनला ६-४, ६-४, ६-० अशा फरकाने हरवले. कॅनडाच्या डेनिस शापोवालोवने एस. क्वोन याचे कडवे आव्हान ७-६, ६-७, ६-७, ७-५, ६-२ अशा पाच सेटमध्ये परतवून लावले. शापोवालोवने चार तास २५ मिनिटांमध्ये ही लढत जिंकली. याखेरीज मॅटीयो बेरेंट्टीनी, पाब्लो कॅरेनो बुस्टा, सेबॅस्टीयन कोर्डा व कॅरेन खाचानोव यांनीही पुरुषांच्या एकेरीत आगेकूच केली.

ओस्तापेंकोचा संघर्षपूर्ण विजय

येलेना ओस्तापेंकोने एलीसन रिस्कवर ४-६, ६-२, ६-४ अशा फरकाने संघर्षपूर्ण विजय मिळवला. तसेच एच. टॅनने माघार घेतल्यामुळे इलीना स्वितोलीनाला पुढल्या फेरीत पोचता आले. टॅनने माघार घेतली तेव्हा इलीना स्वितोलीना ६-३, ५-७, ५-१ अशा फरकाने पुढे होती. ॲश्‍ले बार्तीने लुसीया ब्राँझेटीवर ६-१, ६-१ अशा फरकाने विजय मिळवला. नाओमी ओसाकाने मेडीसन ब्रिगंल हिला ६-०, ६-४ अशा फरकाने नमवले.