T20 WC, India Vs Pakistan: टी-20 वर्ल्डकप स्पर्धेतील सलामीच्या लढतीत पाकिस्तानने पहिल्यांदाच भारतीय संघाला पराभवाचा दणका दिल्याचे पाहायला मिळाले. या सामन्याने एक खास रेकॉर्डही नोंदवला. हा सामना टी-20 वर्ल्ड कपच्या इतिहासात सर्वाधिक पाहिला गेला. याशिवाय भारत-पाक यांच्यातील लढतीनंतर दोन्ही संघातील खेळाडूंच्या खिलाडीवृत्तीची चर्चाही रंगल्याचे पाहायला मिळाले. वर्ल्ड कप स्पर्धेतील या सामन्यानंतर पाकिस्तानी संघाचा कर्णधार बाबर आझम भारतीय संघाच्या कर्णधाराच्या कानात काहीतरी सांगताना दिसले होते. यावेळी बाबरनं किंग कोहलीच्या कानात नेमकं काय सांगितलं हा प्रश्न तमाम क्रिकेट चाहत्यांना पडला होता. कोहलीसोबत जे काही बोलणं झालं ते अजूनही गुलदस्त्यातच आहे.

पाकिस्तानी पत्रकाराने याच उत्तर काढण्याचा प्रयत्न केला. त्याने बाबरला यासंदर्भात प्रश्न विचारला होता. यावर बाबर म्हणाला की, कोहलीसोबत जे बोललो ते मी सार्वजनिक करु शकत नाही. त्यानंतर या पत्रकाराने कोहलीच्या कॅप्टन्सीसंदर्भातही बाबरला प्रश्न विचारला होता. पण पाकिस्तानी मीडिया मॅनेजरने ही पत्रकार परिषद पाकिस्तान वेस्ट इंडीज मालिकेसंदर्भात असल्याचे सांगत विराटसंदर्भातील प्रश्नाला बगल दिली.

विराटच्या कानात काय सांगितले? या प्रश्नावर बाबरनं दिलेलं उत्तर हे क्रिकेट चाहत्यांच्या मनात ही गोष्ट आणखी रुजवणारी अशीच आहे. भविष्यात कोहली तरी ही गोष्ट उघड करणार का? हे पाहणे महत्त्वाचे ठरेल. युएईच्या मैदानात रंगलेल्या टी-वर्ल्ड कप स्पर्धेत पाकिस्तानने भारतीय संघाला पराभूत करण्याची किमया करुन दाखवली होती. युएईतील स्पर्धेत भारतीय संघाला जेतेपदाचे प्रबळ दावेदार मानले जात होते. ज्यावेळी पाकिस्तानने टीम इंडियाला पराभवाचा धक्का दिला त्यावेळी पाकिस्तान दुसऱ्यांदा वर्ल्ड कप जिंकेल, असे बोलले गेले. पण ऑस्ट्रेलियाने सेमी फायनलमध्ये पाकिस्तानचा खेळ खल्लास केला. पाकिस्तानला नमवणाऱ्या ऑस्ट्रेलियाने फायनलमध्ये न्यूझीलंडला शह देत पहिला वहिला टी-20 वर्ल्ड कप जिंकला होता.