नवी दिल्ली : भारताचा सलामीवीर मयांक अग्रवाल इंग्लंडला रवाना झाला असून तो भारतीय कसोटी संघात सामील होणार आहे. रोहित शर्मा कोरोना पॉझिटिव्ह आढळून आल्याने बीसीसीआयने मयांकला त्याचा बॅकअप म्हणून इंग्लंडला पाठवले आहे. भारत इंग्लंड यांच्यातील एकमेव कसोटी सामना 1 जुलै पासून सुरू होणार आहे. (BCCI Send Mayank Agarwal England As COVID 19 Positive Rohit Sharma Backup)

लिसेस्टरशायर विरूद्धच्या सराव सामन्यात पहिल्या दिवशी रोहित शर्माने फलंदाजी केली. मात्र त्यानंतर त्याची रॅपिड अँटीजेन टेस्ट पॉझिटिव्ह आल्याने त्याला विलगीकरणात ठेवण्यात आले. रोहित 1 जुलैपर्यंत फिट होण्याची शक्यता असली तरी बीसीसीआयने 31 वर्षाच्या मयांक अग्रवालला इंग्लंडला रवाना केले आहे. मयांकला इंग्लंडविरूद्धचा कसोटी संघ जाहीर झाला त्यावेळी संघात स्थान मिळाले नव्हते. मात्र आधी केएल राहुलला झालेली गंभीर दुखापत आणि त्यानंतर रोहित शर्मा कोरोना पॉझिटिव्ह आढळून आल्याने मयांकची संघात वर्णी लागली.

बीसीसीआयने पीटीआयला दिलेल्या माहितीनुसार 'मयांक अग्रवाल आज इंग्लंडसाठी रवाना होत आहे. तो रोहितचा बॅकअप म्हणून संघात असेल. गरज लागली तर तो इंग्लंडविरूद्धच्या कसोटी सामन्यात देखील खेळेल. युकेमध्ये सध्या कोरोनाविषयक खबरदारीचे नियम लागू करण्यात आलेले नाहीत. त्यामुळे मयांकची आरटीपीसीआर टेस्ट निगेटिव्ह आली तर त्याला कोणत्याही विलगीकरणात रहावे लागणार नाही.'

इंग्लंडमधील एकमेव कसोटी सामना हा गेल्या वर्षी झालेल्या कसोटी मालिकेतील स्थगित झालेला पाचवा सामना आहे. त्यावेळी भारतीय संघात कोरोनाच उद्रेक झाल्याने पाचवा कसोटी सामना स्थगित करण्यात आला होता. आता हा कसोटी सामना आणि त्याच्याबरोबर तीन टी 20 आणि तीन वनडे सामन्यांची मालिका होणार आहे. गेल्या कसोटी मालिकेत भारताने 2 - 1 अशी आघाडी घेतली होती.