Nagpur News : केनियन धावपटूंचे वर्चस्व मोडून काढत २०२२ च्या बर्मिघम राष्ट्रकुल क्रीडा स्पर्धेत तीन हजार मीटर स्टीपलचेस शर्यतीत रौप्यपदक जिंकणाऱ्या सुभेदार अविनाश साबळे यांना यंदा अतिविशिष्ट सेवा पदक जाहीर झाले.

बीड जिल्ह्यातील आष्टी तालुक्यातील मांडवा येथील रहिवासी असलेल्या अविनाश साबळे यांना गेल्यावर्षी विशिष्ट सेवा पदकाने सन्मानित करण्यात आले होते. लष्करात असलेले अविनाश साबळे म्हणाले, जेव्हा असा सन्मान होतो, त्यावेळी आणखी चांगली कामगिरी करण्याची प्रेरणा मिळते.

निश्चितच हा सन्मान मला भविष्यात सर्वोत्तम कामगिरी करण्यासाठी प्रेरणा देईल, यात शंका नाही. तसेच केलेल्या कार्याचे, सेवेबद्दल कौतुक होते, त्यावेळी साहजिकच आनंद होतो. सन्मान मिळाला असला तरी देशासाठी राष्ट्रकुल, ऑलिंपिक, आशियायी व जागतिक स्पर्धेत सर्वोत्तम कामगिरी करणे आणि देशाची सेवा करण्यासाठी कटिबद्ध आहे. सध्या तो बंगळूर येथे सराव करीत आहे.