सिडनी : बिग बॅश लीगच्या (Big Bash League) सेमी फायनलमध्ये एक अजब प्रकार घडला. सिडनी क्रिकेट ग्राऊंडवर सिडनी सिक्सर्स (Sydney Sixers) आणि अ‍ॅडलेड स्टाईकर (Adelaide Strikers) यांच्यात सेमी फायनल सामना सुरू होता. या सामन्यात सिडनी सिक्सर्सने अ‍ॅडलेड स्ट्रायकरचा चार विकेट्सनी पराभव करत फायनलमध्ये प्रवेश केला. मात्र गतविजेत्या सिडनी सिक्सर्सने सामना जिंकण्यासाठी एक अजब प्रकार केला. (Big Bash League Sydney Sixers Coach Jay Lenton Enter In Stadium after Jordan Silk retired)

सिडनी सिक्सर्सला विजयासाठी १ चेंडूत २ धावांची गरज होती. जॉर्डन सिल्क (Jordan Silk) फलंदाजी करत होता. मात्र सिडनी सिक्सर्सच्या प्रशिक्षकांनी जॉर्डन सिल्कला रिटायर करत आपले सहयोगी कोच जे लेंटन (Jay Lenton) यांना फलंदाजीला पाठवले. सिडनी सिक्सर्सने घेतलेल्या या निर्णयावर आता टीका होत आहे.

सेमी फायनल सामन्यापूर्वी सिडीन सिक्सर्सचा विकेट किपर दोश फिलिप (Josh Philippe) कोरोना पॉझिटिव्ह आढळून आला. त्यामुळे सिक्सर्सने आपल्या संघात ऐनवेळी सहयोगी कोच लेंटन यांचा प्लेईंग इलेव्हनमध्ये समावेश केला. क्रिकेटमध्ये सपोर्ट स्टाफ सदस्य प्लेईंग इलेव्हनमध्ये खेळण्याची ही पहिलीच घटना नाही. यापूर्वीही अनेक सपोर्ट स्टाफमधील सदस्य प्लेईंग इलेव्हनमध्ये खेळले आहेत.

दरम्यान, सेमी फायनलमध्ये सिडनी सिक्सर्सची (Sydney Sixers) फिल्डिंग सुरू असताना जॉर्डन सिल्कच्या मांडीचा स्नायू दुखावला होता. त्यामुळे त्याला संघाने वरच्या क्रमांकावर फलंदाजी करण्याऐवजी संघ व्यवस्थापनाने आठव्या क्रमांकावर फलंदाजीला पाठवले होते. मात्र धावा घेण्यासाठी त्याला संघर्ष करावा लागत होता. त्यामुळे सिडनी सिक्सर्सच्या मुख्य प्रशिक्षकांनी सामन्याच्या शेवटच्या चेंडूआधी त्याला रिटायर केले आणि सहयोगी कोच जे लेंटनला फलंदाजीला पाठवले. ही रणनीती सिडनी सिक्सर्सच्या पथ्यावर पडली. त्यांनी शेवटच्या चेंडूवर सामना जिंकत फालनमध्ये प्रवेश केला.