नवी दिल्ली : भारताची महिला कुस्तीपटू बबिता फोगाट ही सोशल मीडियावर राजकीय भाष्य करण्यात अग्रेसर असते. तिने नुकतेच एक ट्विट केले आहे. या ट्विटचा संदर्भ लोकं उदयपूर येथे कन्हैयालाल हत्या प्रकरणाशी (Kanhaiyalal Murder Case) जोडत आहेत. बबिता फोगाटने ट्विट केले की, 'हा माझा हिंदूस्तान आहे, इथं हिंदूंचा जीव महत्वाचा'. हे ट्विट करत असताना बबिताने आपला फोटो देखील सोशल मीडियावर शेअर केला. तिने #HinduLivesMatters हा हॅशटॅग देखील वापरला.

विशेष म्हणजे बबिता फोगाट ही भाजपची नेता आहे. याचबरोबर तिने कुस्तीत भारताला 2014 मध्ये राष्ट्रकुल स्पर्धेत सुवर्ण पदक जिंकले होते. याचबरोबर तिने 2010 आणि 2018 राष्ट्रकुल स्पर्धेत रौप्य पदकाची कमाई केली होती. बबिताने वर्ल्ड रेसलिंग चॅम्पियनशिपमध्ये कांस्य पदक जिंकले होते.

दरम्यान, राजस्थान मधील उदयपूरमध्ये कपडे शिलाईचे काम करणाऱ्या कन्हैया लालचा (Kanhaiyalal Murder Case) एका सोशल मीडिया पोस्टवरून खून (Udaipur Murder Case) करण्यात आला. यानंतर देशभरात संतापाचे वातावरण निर्माण झाले आहे. मारेकऱ्यांनी कपडे शिवयला आल्याचा बहाणा करत कन्हैया लालचा गळा चिरला होता. या प्रकराणावर देशभरातील अनेक प्रसिद्ध लोकांनी आणि राजकारण्यांनी प्रतिक्रिया दिली. यावर आता भारताचा क्रिकेटपटू अमित मिश्राने (Amit Mishra) देखील ट्विट करून आपली प्रतिक्रिया दिली.

अमित मिश्राने ट्विट (Tweet) केले की, 'उदयपूरमध्ये घडलेली घटना म्हणजे निव्वळ अराजकता आहे. एका धर्मावर आधारित सोशल मीडिया पोस्टवरून गरीब शिलाई काम करणाऱ्या व्यक्तीचा गळा कापून खून करण्यात आला. आता त्याच्या मानवाधिकाराचे काय? त्याच्या कुटुंबाचे काय? त्याच्या धर्माचे काय?'