Cheteshwar Pujara 100th Test : भारत आणि ऑस्ट्रेलिया यांच्यातील चार कसोटी सामन्यांच्या बॉर्डर - गावसकर ट्रॉफी मालिकेतील दुसरा सामना दिल्ली येथील अरूण जेटली स्टेडियमवर खेळणार आहेत. हा सामना 17 फेब्रुवारीला सुरू होणार आहे. हा कसोटी सामना WTC फायनलच्या दृष्टीकोणातून भारतासाठी महत्वाचा आहेच.

मात्र याचबरोबर हा कसोटी सामना भारताचा मधल्या फळीतील फलंदाज चेतेश्वर पुजारासाठी देखील अत्यंत महत्वाचा आहे. कारण हा त्याचा 100 वा कसोटी सामना आहे. या विशेष कसोटीपूर्वी चेतेश्वर पुजाराने एका खास व्यक्तीचा आशीर्वाद घेतला. चेतेश्वर पुजाराने नुकतेच देशाचे पंतप्रधान नरेंद्र मोदी यांची पंतप्रधान कार्यालयात जावून भेट घेतली. याबाबचे फोटो सोशल मीडियावर व्हायरल होत आहे.

चेतेश्वर पुजारा आणि त्याची पत्नी यांनी पंतप्रधानांची भेट घेतली. दिल्ली कसोटी ही पुजाराची 100 वी कसोटी आहे. याबाबत खुद्द पंतप्रधान नरेंद्र मोदी यांनी पुजाराने शेअर केलेल्या ट्विटवर उत्तर दिले. ते म्हणाले की, 'आज तुला आणि पुजाला भेटून आनंद झाला. तुझ्या कारकिर्दीतील 100 व्या कसोटीसाठी शुभेच्छा.'

बीसीसीआयने पंतप्रधानांचे हे ट्विट आपल्या अधिकृत ट्विटर अकाऊंटवरून रिट्विट केले.

दरम्यान, चेतेश्वर पुजाराने पंतप्रधानांची भेट घेतल्यानंतर या भेटीचे फोटो शेअर करत ट्विट केले की, 'आदरणीय पंतप्रधान नरेंद्र मोदीजी यांची भेट घेण्याचे भाग्य मला मिळाले. त्यांच्याशी केलेले संभाषण आणि माझ्या 100 व्या कसोटीसाठी त्यांनी वाढवलेला माझा उत्साह यामुळे मी आनंदीत झालो आहे. पीएमओ इंडियाचे आभार!'

भारताने ऑस्ट्रेलिया विरूद्धच्या पहिल्या कसोटी सामन्यात 1 डाव आणि 132 धावांनी विजय मिळवत 4 सामन्यांच्या मालिकेत 1 - 0 अशी आघाडी घेतली आहे. दुसरी कसोटी दिल्लीच्या अरूण जेटली स्टेडियमवर 17 फेब्रुवारीपासून सुरू होणार आहे. मात्र दुसऱ्या कसोटीत रोहित शर्मा आणि निवडसमितीसाठी संघ निवड हा कळीचा मुद्दा ठरणार आहे.

(Sports Latest News)

हेही वाचा : नेट बँकिंग सुविधा वापरताय? मग हे नक्कीच वाचा...