Chris Gayle Special Garba Night : भारताचा माजी सलामीवीर विरेंद्र सेहवाग आणि वेस्ट इंडीजचा माजी धडाकेबाज फलंदाज ख्रिस गेल यांनी जोधपूर येथे नवरात्री सेलिब्रेशन केले. हे दोघेही लेजंड लीग क्रिकेट स्पर्धेनिमित्त जोधपूर येथे आले होते. यावेळी या क्रिकेटपटूंनी देशातील सर्वात मोठ्या उत्सव असलेल्या नवरात्रीचा देखील आनंद घेतला. ख्रिस गेल तर पारंपरिक स्पेशल गरबा नाईटच्या तालावर थिरकला. गेलचा हा व्हिडिओ सध्या सोशल मीडियावर व्हायरल होत आहे.

क्रिकेटपटू सहसा त्यांच्या कीटमध्ये वावरत असतात. मात्र सध्या त्यांनी पारंपरिक वेशभुषेत गरबा खेळत सर्व चाहत्यांचे लक्ष वेधून घेतले. लेजंड लीग क्रिकेट स्पर्धा खेळण्यासाठी सध्या गुजरात जायंट्सचा संघ जोधपूरमध्ये आला आहे. या संघाचे नेतृत्व विरेंद्र सेहवाग करत असून संघ प्ले ऑफसाठी पात्र देखील झाला आहे. गुजरात जायंट्स बरकतुल्ला खान स्टेडियमवर सोमवारी एलिमनेटरचा सामना खेळणार आहे.

गुजरात जायंट्सकडून खेळणाऱ्या ख्रिस गेलने दोन सामन्यात 15 आणि 68 धावांची खेळी केली. या दोन्ही खेळी त्याने भिलवारा किंग्जविरूद्धच्या सामन्यात केल्या. गुजरात जायंट्स संघात विरेंद्र सेहवाग आणि ख्रिस गेल यांच्याशिवाय पार्थिव पटेल, केव्हिन ओब्रायन, ग्रॅमी स्वान, रिचर्ड लिव्ही आणि अंजता मेंडीस या आंतरराष्ट्रीय खेळाडूंचा समावेश आहे.