Colin Munro Viral Video Latest News : सध्या पाकिस्तानमध्ये टी-२० लीग 'पाकिस्तान सुपर लीग' खेळवली जात आहे. संपूर्ण जगाच्या नजरा या लीगकडे लागल्या आहेत. वेगवेगळ्या देशातील अनेक दिग्गज खेळाडू या लीग मध्ये खेळत आहेत. या लीगमध्ये 4 मार्च रोजी इस्लामाबाद युनायटेड आणि पेशावर जल्मी यांच्यात सामना झाला. या सामन्यात इस्लामाबाद युनायटेड संघाच्या एका खेळाडूचा व्हिडीओ सध्या तुफान व्हायरल होत आहे. या व्हिडीओमध्ये एक खेळाडू सुरू सामन्यादरम्यान बॉल बॉयला कॅच पकडण्याचं ट्रेनिंग देताना दिसून आला.

न्यूझीलंडचा क्रिकेटर कोलिन मुनरो हा टी-20 क्रिकेटमधील सर्वोत्कृष्ट फलंदाज मानला जातो. तर व्हायरल होत असेल्या व्हिडीओमध्ये मुनरो हा सामन्यादरम्यान बॉलबॉयला बाउंड्रीवर कॅच कसा पकडायचा याचं प्रशिक्षण देताना दिसत आहे.

नेमकं काय झालं?

सामन्यात इस्लामाबाद संघ क्षेत्ररक्षण करत असताना पेशावरच्या एका फलंदाजाने फाइन लेगवर शॉट खेळला, जो बाँडरीच्या बाहेर गेला. हा सिक्सर थेट बॉल बॉयच्या हातात गेला. मात्र या बॉल बॉयला तो कॅच पकडता आला नाही. यानंतर तो बॉलबॉय चांगलाच निराश झाल्याचं पाहायला मिळालं. यानंतर मुनरो हा काही काळासाठी त्या मुलाचा प्रशिक्षक बनला आणि त्याने त्या मुलाला झेल कसा पकडायाचा याचं ट्रेनिंग दिलं. काही वेळाने पुन्हा या मुलाकडे चेंडू आला आणि त्याने यशस्वीरित्या कॅच पकडला देखील. हा कॅच पकडल्यानंतर बॉल बॉय आणि मुनरो दोघेही खूप आनंदी झाले. मनरोने त्या कॅच पकडणाऱ्या मुलाला मिठी देखील मारली.

मुनरेच्या या कृतीचं सोशल मीडियावर तुफान कौतुक करत आहेत. या व्हिडीओवर नेटकऱ्यांकडून लाइक्स आणि कमेंट्सचा पाऊस पडताना पाहायला मिळत आहे.

सामन्यात प्रथम फलंदाजी करताना इस्लामाबादने चार गडी गमावून १९६ धावा केल्या. यानंतर पेशावर संघाला २० षटकांत ९ गडी गमावून केवळ १६७ धावा करता आल्या. इस्लामाबादने हा सामना २९ धावांनी जिंकला.