T20 World Cup 2024, India vs Pakistan: टी20 वर्ल्ड कप 2024 स्पर्धेला रविवारी (2 जून) सुरुवात होत आहे. या स्पर्धेच्या पहिल्याच फेरीत भारत आणि पाकिस्तान हे दोन संघ आमने-सामने येणार आहेत. या सामन्याची सध्या जोरदार चर्चा देखील आहे.

भारत आणि पाकिस्तान यांच्यात 9 जून रोजी न्युयॉर्कमध्ये सामना होणार आहे. अशात या सामन्याबद्दल ब्रॉडकास्टर स्टार स्पोर्ट्सशी बोलताना हरभजन सिंग, इरफान पठाण आणि मिस्बाह-उल-हकने आपापली मतं मांडली आहेत.

यावेळी मिस्बाहने पाकिस्तानसाठी सर्वात मोठा अडसर ठरू शकणाऱ्या भारतीय खेळाडूबद्दलही भाष्य केले. मिस्बाह 2007 टी20 वर्ल्ड कपमध्ये पाकिस्तानचा कर्णधार होता. या वर्ल्ड कपमध्ये भारताने पाकिस्तानला अंतिम सामन्यात पराभूत करत विजेतेपद मिळवले होते.

मिस्बाहला यंदा पाकिस्तानसाठी सर्वात मोठा धोका कोणापासून असू शकतो असे विचारले असता कोणताही संकोच न करता त्याने भारताचा स्टार फलंदाज विराट कोहलीचे नाव घेतले.

मिस्बाह म्हणाला, 'भारत-पाकिस्तान सामन्यात हे खूप महत्त्वाचे ठरेल की किल्ला कोण आधी सर करेल, कोणाकडे हा आत्मविश्वास असेल की आपल्या देशासाठी आधी सामने जिंकवले आहेत, कारण त्या खेळाडूंना माहिती आहे की दवाब कोणत्या स्तरावर जाऊ शकतो.'

'दबावाला कसे सांभाळायचे, याबाबतीत तरी सर्वात मोठा अडथळा विराट कोहलीचाच असेल. तो एक असा खेळाडू आहे, ज्याने अनेकदा कठीण परिस्थितीतही प्रतिस्पर्धी संघांकडून विजय खेचून आणला आहे.'

मिस्बाह म्हणाला, असे खेळाडू नेहमीच धोकादायक असतात, याबाबत विचार व्हायला हवा, पाकिस्तानलाही या गोष्टी लक्षात यायला हव्यात.

याशिवाय मिस्बाहने गोलंदाजांबद्दलही भाष्य करताना जसप्रीत बुमराहचेही कौतुक केले. त्याने म्हटले की भारतासाठी बुमराह या स्पर्धेत त्याची छाप पाडेल. मिस्बाह म्हणाला, 'मला गोलंदाजीबाबत जसप्रीत बुमराह आवडतो. गोलंदाजीत तो अनुभवी खेळाडू आहे.'

'मर्यादीत षटकांच्या बाबतीत तो नवीन आणि जुन्या चेंडूने ज्याप्रकारे गोलंदाजी करतो, ते पाहाता तो नक्कीच त्याची छाप पाडू शकतो. तो भारतासाठी महत्त्वाची भूमिका बजावू शकतो. सुरुवातीचे पंच पाकिस्तानला तोच मारू शकतो.'

दरम्यान, या टी२० वर्ल्ड कपमध्ये भारत आणि पाकिस्तान संघ पहिल्या फेरीसाठी अ गटात आहेत. या गटात त्यांच्यासह अमेरिका, कॅनडा आणि आयर्लंड आहेत.