टी-20 वर्ल्ड कप स्पर्धेतील टीम इंडिया विरुद्धचा ऐतिहासिक विजय पाकिस्तानी माजी खेळाडू आणि फॅन्ससह पत्रकारांना पचनी पडल्याचे दिसत नाही. एका बाजूला पाकिस्तानचा संघ स्पर्धेत दमदार कामगिरी करत असताना दुसऱ्या बाजूला काही वाचाळवीर भारतीय क्रिकेटर हरभजन सिंगला ट्रोल करताना पाहायला मिळते. भज्जीही त्यांना सडेतोड उत्तर देताना दिसते.

अफगाणिस्तान विरुद्धच्या सामना 5 विकेट्स राखून जिंकत पाकिस्तान संघाने स्पर्धेतील सलग तिसरा विजय नोंदवला. असिफ अलीने या सामन्यात 4 षटकार खेचले. भज्जीने ट्विटरच्या माध्यमातून त्याच्या धोनी स्टाईल फिनिशिंचे कौतुकही केले. पण एका पाकिस्तानी महिला क्रिकेटरने असिफने मारलेल्या षटकारांचा दाखला देत भज्जीला ट्रोल केल्याचे पाहायला मिळाले.

अफगाणिस्तान विरुद्धच्या सामन्यात पाकिस्तान संघाला अखेरच्या 12 चेंडूत 24 धावांची आवश्यकता होती. असिफ अलीने चार षटकार खेचत 19 व्या षटकातच अफगाणिस्तानचा खेळ खल्लास केला. त्याच्या या खेळीचं भज्जीन ट्विटच्या माध्यमातून कौतुक केले. अखेरच्या चेंडूवर एकेरी धाव घेण्यास नकार देऊन असिफ अलीने आपल्यातील स्फोटक फटकेबाजी दाखवून दिली. त्याचा आत्मविश्वास कमालीचा होता, असे ट्विट हरभजन सिंगने केले होते.

हरभजन सिंगच्या या ट्विटवर पाकिस्तानी महिला पत्रकार सुमैरा खानने खोडकरपणा दाखवला. भज्जीला टॅग करत तिने पुन्हा एकदा चार षटकार, असे लिहित वाकओव्हर हवा का? असा प्रश्न उपस्थितीत करत विनाकारण भज्जीला ट्रोल करण्याचा प्रयत्न केला. या ट्विटनंतर शांत बसेल तो हरभजन कसला. त्यानेही या महिला पत्रकाराला सभ्य भाषेत सडेतोड उत्तर दिले. भज्जीन एक स्क्रीनशट शेअर केलाय. ‘Keep rolling your eyes maybe you’ll find a brain back there.’ असे लिहित किमान एवढं इंग्लिश कळत असेल. अशा शब्दांत भज्जीनं पाक महिला पत्रकाराची फिरकी घेतली आहे.