Quinton De Kock on Black Lives Matter: टी२० विश्वचषक स्पर्धेत विंडिजविरूद्ध दक्षिण आफिकेने आपला पहिला सामना खेळला. त्या सामन्यात आफ्रिकेने दमदार विजय मिळवला. पण त्या सामन्यात दक्षिण आफ्रिकेचा (South Africa) अनुभवी सलामीवीर क्विंटन डी कॉक खेळला नव्हता. कृष्णवर्णीयांच्या हक्कांबाबत सुरू असलेल्या मोहिमेसंदर्भात त्याने सामना न खेळण्याचा निर्णय घेतला होता. पण असं असलं तरी टी२० विश्वचषकाच्या उर्वरित सामन्यांसाठी तो उपलब्ध असणार आहे, असं डी कॉकने स्पष्ट केलं. विंडिजविरूद्धच्या सामन्यात क्विंटन डी कॉक संघाबाहेर बसला होता. त्यावेळी त्याने वैयक्तिक कारणास्तव सामन्याला मुकल्याचे स्पष्ट केले होते. मात्र आता यापुढील सर्व सामन्यांमध्ये तो संघाकडून खेळणार असल्याची माहिती दक्षिण आफ्रिका क्रिकेट बोर्डाने ICCला दिली.

"मी माझ्या संघातील सहकाऱ्यांची आणि चाहत्यांची माफी मागतो. ज्या लोकांना माझ्या कौटुंबिक पार्श्वभूमीबाबत माहिती नाही त्यांना मी सांगू इच्छितो की माझ्या कुटुंबात सर्व वर्णाची लोकं आहेत. माझ्या काही बहिणी या वेगळ्या वर्णाच्या आहेत. तर माझी सावत्र आई कृष्णवर्णीय आहे. कृष्णवर्णीय लोकांच्या हक्कांसाठी सध्या Black Lives Matter ही मोहिम चालवली जात आहे. पण माझ्यासाठी मी जेव्हा जन्माला आलो तेव्हापासूनच ही मोहिम आणि कृष्णवर्णीयांचे जीव महत्त्वाचे आहेत", असं क्विंटन डी कॉकने आपल्या पत्रकात म्हटले आहे.

"मला लहानपणापासून हेच शिकवण्यात आलंय की आपल्या साऱ्यांनाच मूलभूत हक्क आहेत. आणि ते सर्व हक्क अतिशय महत्त्वाचे आहेत. जेव्हा सामना सुरू होण्याआधी गुडघ्यावर बसून BLM ला समर्थन देण्याबद्दल मला सांगण्यात आलं तेव्हा मला असं वाटलं की माझे हक्क हिरावून घेतले जात आहेत. त्यामुळे मी तसा निर्णय घेतला होता", असंही डी कॉकने नमूद केलं.