T20 World Cup 2024, India vs USA: टी20 वर्ल्ड कप 2024 स्पर्धेत बुधवारी भारत आणि अमेरिका संघात सामना होणार आहे. हा सामना न्युयॉर्कमधील नसाऊ काऊंटी आंतरराष्ट्रीय क्रिकेट स्टेडियमवर होणार आहे. हा सामना भारतीय प्रमाणवेळेनुसार रात्री 8 वाजता, तर स्थानिक वेळेनुसार सकाळी 10.30 वाजता चालू होणार आहे.

दोन्ही संघांचा हा या स्पर्धेतील तिसरा सामना आहे. भारताने या स्पर्धेत आयर्लंड आणि पाकिस्तानला पराभूत केले आहे. तसेच अमेरिकेने या स्पर्धेत कॅनडा आणि पाकिस्तानला पराभूत केलेलं आहे. त्यामुळे दोन्ही संघ या स्पर्धेत आत्तापर्यंत अपराजित आहेत.

त्यामुळे या दोन्ही संघांनी सुपर-8 फेरीसाठी दावेदारी ठोकलेली आहे. त्याचमुळे या दोन्ही संघांसाठी हा सामना महत्त्वाचा आहे.

दरम्यान, न्युयॉर्कमध्ये गेल्या काही दिवसांपासून पावसाच्या सरी बरसत आहेत. रविवारीही भारत आणि पाकिस्तान सामन्यादरम्यान पावसाचा व्यत्यय आला होता. त्यामुळे बुधवारी न्युयॉर्कमधील हवामान कसे असेल, याबद्दल अनेकांना प्रश्न पडला असेल.

Accuweather ने दिलेल्या माहितीनुसार न्युयॉर्कमध्ये दिवसा हलक्या पावसाच्या सरी बरसण्याची शक्यता आहे. तसेच वातावरण काहीसे ढगाळ राहू शकते. त्याचबरोबर उनसावलीचा खेळही दिसू शकतो.

एकूणच या वातावरणामुळे आणि स्थानिक वेळेनुसार सामना सकाळी होणार असल्याने खेळपट्टी ताजी असेल, ज्याचा फायदा गोलंदाजांना होऊ शकतो.

असे आहेत संघ

• भारत - रोहित शर्मा, यशस्वी जैस्वाल, विराट कोहली, सूर्यकुमार यादव, ऋषभ पंत (यष्टीरक्षक), संजू सॅमसन (यष्टीरक्षक), हार्दिक पांड्या (उपकर्णधार), शिवम दुबे, रवींद्र जडेजा, अक्षर पटेल, कुलदीप यादव, युजवेंद्र चहल, अर्शदीप सिंग, जसप्रीत बुमराह, मोहम्मद सिराज.

• अमेरिका - स्टीव्हन टेलर, मोनांक पटेल (यष्टीरक्षक/कर्णधार), अँड्रिज गॉस, ऍरोन जोन्स, नितीश कुमार, कोरे अँडरसन, हरमीत सिंग, जसदीप सिंग, नॉथुश केंजिगे, सौरभ नेत्रावळकर, अली खान, निसर्ग पटेल, शायन जहांगीर, मिलिंद कुमार, शेडली व्हॅन शाल्कविक