T20 World Cup 2024, Bangladesh vs Nepal: क्रिकेट विश्वात गेल्या अनेक महिन्यांपासून नेपाळच्या चाहत्यांची चर्चा आहे. सध्या चालू असलेल्या टी20 वर्ल्ड कपमध्येही नेपाळ संघाच्या चाहत्यांनी लक्ष वेधले आहे. आपल्या संघाला त्यांनी उत्फुरतपणे पाठिंबा दिला आहे. असाच उत्साह टी20 वर्ल्डकपमधील त्यांच्या अखेरच्या सामन्यातही दिसला आहे.

नेपाळने सोमवारी (17 जून) बांगलादेशविरुद्ध सेंट विन्सेंट येथे टी20 वर्ल्ड कप 2024 मधील अखेरचा सामना खेळला. या सामन्यात बांगलादेशने 21 धावांनी विजय मिळवत सुपर-8 मध्ये स्थान मिळवले आहे. पण याच सामन्यात एका चाहत्याने सर्वांचे लक्ष वेधले होते.

झाले असे की सहाव्या षटकात नेपाळचा कर्णधार रोहित पौडेलने चौथ्या चेंडूवर बांगलादेशच्या तौहिद हृदोयला 9 धावांवर बाद केले. हृदोयचा झेल संदीप लामिछानेने पकडला.

या विकेटचा आनंद स्टेडियममध्ये असलेल्या नेपाळच्या चाहत्याला इतका झाला की त्याने स्टेडियममधील पाण्याने भरलेल्या पुलमध्ये नेपाळचा झेंडा हातात धरत आंनंदाने उडी मारली. त्यानंतरही तो पाण्यातून बाहेर येत सेलीब्रेशन करताना दिसला . हा व्हिडिओ आयसीसीने शेअर केला असून तुफान व्हायरल होत आहे.

दरम्यान, या सामन्याबद्दल सांगायचे झाले तर बांगलादेशने दिलेल्या 107 धावांच्या लक्ष्याचा पाठलाग करताना नेपाळचा संघ 19.2 षटकात 85 धावांवरच सर्वबाद झाला. नेपाळकडून कुशल मल्ला (27), दिपेंद्र सिंग ऐरे (25) आणि असिफ शेख (17) या तिघांनाच दोन आकडी धावसंख्या गाठता आली.

बांगलादेशकडून तांझिम हसन साकिबने सर्वाधिक 4 विकेट्स घेतल्या. तसेच मुस्तफिजूर रेहमानने 3 विकेट्स घेतल्या. त्याचबरोबर शाकिब अल हसनने 2 विकेट्स, तर तस्किन अहमदने 1 विकेट घेतली.

तत्पुर्वी बांगलादेशने प्रथम फलंदाजी करताना 19.3 षटकात सर्वबाद 106 धावा केल्या. बांगलादेशकडून शाकिब अल हसन (17), महमुद्दुलाह (13), रिषाद हुसैन (13), तस्किन अहमद (12), जेकर अली (12) आणि लिटन दास (10) यांनी दोन आकडी धावा केल्या. मात्र, कोणालाही 20 धावांचा टप्पा पार करता आला नाही.

नेपाळकडून गोलंदाजी करताना सोमपाल कामी, दिपेंद्र सिंग, रोहित पौडेल आणि संदीप लामिछाने या सर्वांनी प्रत्येकी 2 विकेट्स घेतल्या.